Дуьньяда

Бейтерефвал теклифна

Украинадин Верховный Рададин виликан депутат, 2016-йисуз уьлкведай экъечIай А.Онищенкоди В.Зеленскийдиз Россиядинни США-дин арада бейтерефвал хуьнин теклиф гана. “Lenta.ru” чешмеди хабар гузвай­вал, идан гьакъиндай виликан депутатди “112 Украина” телеканалда мал­умарна.

Адан фикирдалди, Россиядихъни США-дихъ галаз гьа са вахтунда алакъаяр хъсанаруни Украинадиз уьлкведа экономика вилик тухуз куьмек гуда. “Ада садахъ галазни женг чIугун лазим туш, ада Россиядин­ сиясат РагъакIидай патаз ва я РагъакIидай патанди Россиядиз акси хьу­нин тереф хуьнин лазимвални авач, ада “Зун Украина патал я ва уьлкведа гьалар хъсан хьун патал за вири крар кьилиз акъудда” — лозунг кьилинди яз гьисабна кIанда”, — къейдна ада.

Онищенкодик 2016-йисуз лутувиляй ва 100 миллион евродин кьадарда уьлкведин хазина чуьнуьхунай тахсир кутунай. Адалай кьулухъ депутат Украинадин сергьятрай экъечIнай. 2019-йисан июлдиз ада ватандиз хквез кIанзавайдакай ва виликан президент П.Порошенкоди «чуьнуьхай» пул хкуникай малумарнай. Ада къейд авурвал, гьукумдин кьиле акъвазай вад йисан вахтунда Порошенкоди ва адан къваларив гвайбуру вад миллиард доллар чуьнуьхна.

ЦIайлапандин цIаяри…

Мукьвара Испаниядин меркезда цIайлапанди ягъуникди цIай кьунин дуьшуьш арадал атана ва адан нетижада 40 автоприцеп (чархараллай кIвалер) кана. Идакай “Новости” РИА-ди хабар гузва.

Чархараллай кIвалер Испаниядин Каталонияда акъвазарнавай. ЧIуру агьвалат Жирона вилаятда кьиле фена, садлагьана арадал атай цIай агъзурни вад виш метрдин мензилдиз кьван чкIана.

Туризмдиз — зиян

Гуржистандин премьер-министр Мамука Бахтадзеди Россиядай къвезвай  сиягьатчийрин кьадар тIимил хьуникди уьлкведин туризмдин хилез хьайи зиянар малумарна. Идакай “ТАСС” чешмеди хабар гузва.

“Чна къачур камари хабар гузва хьи, гьар гьикI хьайитIани, туризмдин хиле идалай вилик гьихьтин гьалар авайтIа, гьабур чна арадал хкида. Июлдин вацран делилралди, уьлкведин туризмдин хилез 60 миллион доллардин зарар хьана, гьа са вахтунда июндин вацра Аджария регионда, алатай йисан и девирдив гекъигайла, цIи туризм 40 процентдин вилик фенва”, — къейдна Бахтадзеди.

Гуржистандин меркезда Россиядиз акси санкцияр 20-июндиз ишлемишиз башламишнай. Абур кардик кутунин себебни Россиядин делегатри православидин межпарламентский ассамблеядин сессияда ишти­ракун хьана. Идалайни гъейри, кьилин наразивилер адахъ галаз алакъалу я хьи, тешкилатдин председатель, Госдумадин депутат Сергей Гаврилов Гуржистандин парламентдин спикердин чкадал ацукьна. Гаврилова вичи ихтилатзавайвал, а чкадал ам, серенжемдин протоколдал асаслу яз, кьабулзавай терефди ацукьарна.

Арадал атай вакъиаяр себеб яз В.Путина 8-июлдилай Россиядин авиациядин тешкилатри Гуржистандихъ галаз авай алакъаяр атIунин гьа­къин­дай къарар акъудна. Гуржистандин статистикадин делилралди, ала­тай йисуз ана хьайи гьар вад лагьай турист (21 процент) Россиядай тир.

Тешкиллувилин центр

Сириядин хатасуз зонада санал кьиле тухудай гьерекатрин рекьяй тешкиллувилин центр кардик кутун патал Америкадин ругуд военный Туьркиядин Шанлыурфа вилаятдиз фена. Идакай “Haberturk” телеканалди малумарнава.

Тешкиллувилин махсус центр арадал гъуниз талукь кIвалахдив га­тIуннава. Малум хьайивал, центр мукьвара, Америкадин аскеррин кьадар артух хьайила, кардик акатда. Сириядин кеферпата буфердин зона арадал гъунни Центрадин везифайрикай сад жеда.

8-августдиз США-ди Сирияда Туьркияди курдриз акси гьерекатар тухузвай зонадай экъечIдайдакай малумарнай. Къейд ийин, Сирияда 2011-йисалай президент Асадан ва бунтчийрин арада акьунар, аксивилер давам жезва. Къалмакъал гражданрин гегьенш дяведиз элкъвена, гьа девирда террористрин тешкилатарни, гьа жергедай яз ИГ-ни (ам Россияда къадагъа авунва) жанлу хьана. США-ди ва Европадин бязи уьлквейри оппозициядин тереф хуьзва, Россияди лагьайтIа, Асадан гьукуматдиз куьмек гузва.

Гадарнавай посылкаяр

Волгограддин областдин Новенький поселокдин агьалийриз “Россиядин Почтади” гадарнавай  AIiExpress-дин вишералди посылкаяр авай фур жагъана. Идакай “Lenta.ru” чешмеди хабар гузва.

“Къарникъузар кIватIун патал чун тамуз фена, ана лагьайтIа, почтадин вишералди пакетар гадарнавай фурал дуьшуьш хьана. Саки вири AIiExpress-дин посылкаяр тир. Къиметлу затIар акъуднавай, амай ужуз куьлуь-шуьлуьяр фуруз гадарнавай”, — малумарна чкадин агьалиди “ВКонтакте” соцсетда.

И агьвалатдихъ галаз алакъалу яз бязибуру вирида санал шикаятдин чар ракъурун, Роспотребнадзор хабардар авун теклифна.

“Россиядин Почтадин” официальный векилди къейднавайвал, арадал атанвай кардиз талукь яз къуллугъдин рекьяй ахтармишунин серен­жем кьиле фида. “Почтадин къуллугъчийрин тахсир тайинарайла, УК-дал асаслу яз, абур жавабдарвилиз чIугвада», — лагьана тешкилатдин векилди.

Идалай вилик, августдиз, Одинцовский райондин зирзибил вегьедай чкадал лазим ксарал ахгакь тавур цIудралди чарар ва гъвечIи посылкаяр гадарнавайди дуьздал акъатнай. Къуллугъдин рекьяй тахсиркарвилиз рехъ гайиди кIвалахдивай азад ийидайвал я.

Гьазурайди — Куругъли Ферзалиев


Всего просмотров: 36

Читайте также: