Дуьньяда

США-диз акси я

Мукьвал тир шаркь патан уьлквейрин арада кьиле фидай рахунра Палестинадиз  США-дикай арачи хьана кIан­завач. “Новости” РИА-ди хабар гузвайвал, ихьтин фикир Магьмуд Аббаса раижна.

“США-ди кьиле тухвай гьерекатрин нетижада арадал атанвай гьалара чна ачухдиз малумарзава: къенин йикъалай гатIунна, чна арачидин дережада аваз США-дихъ галаз ала­къаяр хуьдач, вучиз лагьайтIа чун американвийрин гьерекатриз акси я”, – къейдна Палестинадин регьбер Аббаса Россиядин Президент Владимир Путинахъ галаз кьиле фейи гуьруьшдал.

Адан гафарай малум хьайивал, Палестинадихъ са тIалабун ава: инлай кьулухъ международный дережада аваз кьиле фидай мярекатра США авайни-авачир са арачи тахьун. “Къуй Америка тайин са дестедин пай хьурай”, – алава хъувуна Аббаса.

Тахсир квачир къурбандар

Америкадин Техас штатдин агьалиди вичин пуд аялдин вилик уьмуьрдин юлдаш яна кьена. Идакай “Fox6 TV” чешмеди хабар гузва.

Чкадин полициядин векил Джлди Силвадин гафаралди, Даниэль Мартинес ва адан паб Клаудия Арриага къалриз акъатна. Ажугъдин таъсирдик кваз  Даниэла садлагьана тапанчи акъудна, вичин уьмуьрдин юлдаш яна кьена. Ада чкадал чан гана. Къалдин­ себеб вуч тиртIа ва аялрин шумуд йисар ятIа чешмеди раижзавач.­

* * *

4-февралдиз малум хьайивал, Пакистанда са итимди, мукьва-кьилийри вичин руш гъуьлуьз гузвайдакай хабар хьайила, вири хизандиз гуьлле гана. Руш тухузвай гада итимдиз эсиллагь­ хуш тушир. Асиф Шагьа сифте вичин паб, ахпа кьве руш яна кье­­на, 15 йис хьанвай хцел залан хирер авуна. Къанлу буба тахсиркарвал авур чкадилай чуьнуьх хьана.

“Абур акъвазайтIа, чунни акъвазда”

“Новости” РИА-дин делилралди, США-дин Президент Дональд Трампа къейд авурвал, адаз гележегда уьлкведин ядерный такьатар тIимил хьана кIанзава. Америкадин регьбердин гафаралди, и кар маса уьлквейрин гьерекатрилай аслу жеда.

“Инлай кьулухъ къведай йисара чавай ядерный такьатар тIи­милариз жедайдак за умудар кутазва, анжах и делил маса инсанри ийизвай крарилай аслу жеда. И хиле чун гьамиша сад ла­гьай чкадал ала. Гележегда амайбурулай мадни вилик фида”, – лагьана Трампа алатай ислен юкъуз.

Ада алава хъувурвал, США-ди цIийи жуьредин ядерный къуватар арадал гъизва. Адан гафаралди, Америка и кар авуниз мажбур жезва, вучиз лагьайтIа и кардал маса уьлквеярни машгъул я. “Эгер абур акъвазайтIа, чунни акъвазда…”, – лагьана Трампа, вичин фикирда авай уьлквейрин тIварар кьун тавуна.

Пеленгрин гьужум

Гватемаладин агьали Чиприано Альварес, кье­фес­да авай 13 пеленгдиз тIуьн гу­дайла, кьве гъиликайни магьрум хьана. Мусибатдин агьвалатдикай “Newsweek” чешмеди хабар гузва.

Дуьшуьш инсанрин вилик арадал атана. Вагьшийри Чиприанодал вегьейла, инсанар ам къутармишиз алахъна. Къванер, кIарасар гьалчиз, са гуж-баладалди инсан пеленгрин гьужумдикай хкудна. Хасаратвилер хьанвайди духтурханадив агакьарна, амма адан гъилер къутармишиз хьанач.

Алай вахтунда Чиприанодин гьал пис туш.

Малум хьайивал, пеленгрин сагьиб чкадин цирк я. Хасаратвилер хьанвайди циркинин кьилевайбуру  вагьшийриз тIуьн гун патал кIвалахал кьабулнавайди. Исятда Гватемаладин гьукумди пеленгар гьихьтин шартIара хуьзвайтIа тайинарзава.

Энтонидин игитвал

“The Daily Mail” чешмеди хабар гузвайвал, Нью-Йоркда 11 йис хьанвай Энтони Пе­рес, 12 йис хьанвай вичин дуст Хуан Амперрес къутармишдайла, телеф хьана.

Дуьшуьш шегьердин Фо­рест тIвар алай паркуна арадал атана­. Мектебдилай кьулухъ жаванар вирел къу­гъвазвай. Садлагьа­на Хуан циз аватна. Энтони, кIусни энгел тавуна, вичин­ дуст къу­тар­мишиз гатIун­на­. Дуст цяй ахкъудиз агакьна, амма вич вириз ават­­на­.

Чкадал атай къутармишдайбурун къуллугъдин векилри мур­кIадин есирда авай виряй Энтони ахкъудна. Анжах адал чан аламачир.

Чешмеди хабар гузвайвал, жаван виряй ахкъуддайла, къутармишзавайбурукай кьве кас, мекьивили тади гана, духтурханадиз аватна.

Энтонидин гъвечIи чанда чIехи рикI авай. Халис дуствилин ялав кузвай рикI.

Гьазурайди – Агьмед Магьмудов


Всего просмотров: 16

Читайте также: