Дуьньяда

Мадуро мукъаят я

Эгер США гужуналди сухулмиш хьайитIа, Венесуэладин президент Николас Мадуроди уьлкведин кьушунар душмандин гьужумдикай хуьнин женгиниз гьазур хьунин патахъай тагькимарна. Идакай “RT” чешмеди раижна.

“Эгер са мус ятIа Кеферпатан Америкадин империяди чи пак чилел гьужумуниз жуьрэт авуртIа, чун, гъиле яракь аваз, ватан хуьз гьазур хьана кIанда”, — малумарна президентди аскеррин вилик.

Мадуродин гафарай, Венесуэла зайифарунин мураддалди Амери­кади “адетдинди тушир дяве” тухузва. Ада тестикьарзавайвал, США-дин разведкадин къуллугъди яракьлу къуватар къенепатай барбатIун патал аскерар пулдихъ маса къачузва.

23-январдиз Гуайдоди вич вахтуналди тир президент яз малумарайдалай кьулухъ Венесуэлада гъулгъула гьатна. США-ди ва Латиндин Америкадинни Европадин са жерге уьлквейри ам гьахълу яз гьисабна. Россияди Николас Мадуродин тереф хуьзва.

Метлеблу рахунар

Д.Трампа В.Путинахъ галаз телефондай квекай раханатIа, гьа­да­кай­ галай-галайвал ихтилатна. Идакай Америкадин регьберди вичин Twitter-аккаунтда раижна.

Ада Путинахъ галаз хьайи суьгьбет яргъалди давам хьайиди, лап хъсанди ва бегьерлуди яз гьисабзава. “За гьамиша лагьайвал, Россия­дихъ, Китайдихъ ва вирибурухъ галаз алакъаяр хъсанарун — им пис ваъ, хъсан кар я”, — къейдна Трампа.

Адан гафарай, Россиядин регьбердихъ галаз абуру алишверишдин, ядерный яракьрал гуьзчивал тухунин месэлаяр, гьакIни Венесуэладин, Украинадин ва Китайдин гьаларни веревирдна.

3-майдиз кьве президентдин арада телефондай кьиле фейи рахунар саки сятни зура давам хьана. Лацу кIвали къейд авурвал, Америкадин терефдин теклифдалди кьиле фейи ихтилат, санлай къачурла, метлеблуди хьана.

Кьулухъди рум гана

И мукьвара боевикри Сириядин Латакия вилаятда авай Россиядин Хмеймим авиабазадиз гуьлле гана. Идакай ТАСС-ди хабар гузва.

Душманвалзавай терефар меслятдал хкунин центрадин регьбер Виктор Купчишина ихтилатзавайвал, Россиядин аскеррилай боевикрин вири гьужумриз кьулухъди рум гуз алакьна. Гьужумрин нетижада инсанриз ва базадин объектриз зарар хьанач.

26-апрелдиз малум хьайивал, Россиядин ВКС-ди Сириядин Хама ва Идлиб вилаятра боевикрин гуьзчивилик квай районрал авиациядин гьужумар авуна. “AI Masdar News” чешмеди къейдзавайвал, Сириядин кеферпатанни рагъакIидай патан мулкара боевикрин дестейрин гьерекатар артух хьунихъ галаз алакъалу яз, Россиядин ВКС-ди алай йисан апрелдин вацра цавай гзаф кьадар  ягъунар кьуна.

Пуд суал

Украинадин радикальный партиядин регьбер Олег Ляшкоди вичихъ цIийиз хкянавай президентдиз гудай пуд асас суал авайдакай малумарнава. Идакай ада вичин Facebook-да кхьенва.

Депутатдиз цIийи президентди уьлкведа гьикI ислягьвал арадал хкидатIа, экономика гьикI гуьнгуьна хутадатIа ва украинвийрин кесибвал гьикI арадай акъуддатIа чир хьана кIанзава.

Январдин вацра радикальный партияди Украинадин президентвиле Ляшкодин кандидат къалурнай. Сечкийра гъалиб хьанайтIа, ада Крымдин ва Донбассдин гьакъиндай В.Путинахъ галаз суьгьбетар туху­да лагьанай. Амма кандидат виридалайни гзаф сесер хьайи вад касдин дестедикни акатнач.

Ветеранриз алава пулар

Майдин вацра 100-лай виниз да­гъустанвийриз — Ватандин ЧIехи дя­ведин ветеранриз, 9-Майдин суварихъ галаз алакъалу яз, РФ-дин Президент В.Путинан указдалди, федеральный бюджетдай 10 агъзур манатдин кьадарда аваз са сеферда пулар гуда. Пул гьар са касдал майдин вацран пенсиядихъ галаз  агакьарда, ар­за гунин лазимвал авач.

РД-дин зегьметдин ва яшайишдин рекьяй вилик тухудай министерст­водай хабар гайивал, суварихъ галаз алакъалу яз алай йисуз республи­ка­дин бюджетдай ВОВ-дин ветеранриз са сеферда 30 агъзур манат гуда.

РикIел хкин: виликан йисара ВОВ-дин ветеранрин гьар вацран пенсиядал 3 агъзур манат (1 агъзур федеральный ва 2 агъзур республикадин бюджетрай)  ва концлагерра хьайибурун гьар вацран пенсиядални республикадин бюджетдай 2 агъзур манат уьмуьрлух яз гудай пулни алава хъувунай. ВОВ-дин ветеранриз 5 йисалай са сеферда кIвал ремонтдай пулни -100 агъзур — чара ийизва (амма и кIвал 5 йисалай тIи­мил тушир вахтунда ветерандин хсусиятда хьун герек я). Коммунальный къуллугърай ветеранри гьакъидин 50 % гузва.

Гьазурайди — Куругъли Ферзалиев


Всего просмотров: 18

Читайте также: