Дуьньяда

Лукашенкодин наразивал

Белоруссиядин эцигунрал машгъул устIарар къецепатан уьлквейриз ахмиш хьуниз килигна, и уьлкведин президент Александр Лукашенкоди гьукуматдин кIвалахдилай наразивал малумарна. Идакай “БЕЛТА” чешмеди хабар гана.

Уьлкведин регьберди гьисабзавайвал, министррин советди кадрияр хуьнин месэладиз фикир ганвач. “Гьукуматдин рикIел хкизва: эцигунрин къуллугъар маса уьлквейриз акъудун – им фикир гана кIани, важиблу месэла я. Чи пешекарриз кIвалахиз кIанзаватIа, къуй зегьмет чIугурай. Анжах неинки чпин хизан, гьакI уьлкве патални”, – къейд­на Лукашенкоди.

Президентди кьетIендиз къейдна хьи, эхиримжи вад йисуз Белоруссиядай эцигунрал машгъул 50 агъзур пешекар къецепатан уьлквейриз къазанмишун патал фенва. Ада эцигунрин хиле кIвалахзавай пешекарриз талукь яз зегьметдин гьакъи гунин шартIар уьлкведин регионра сад хьтинбур туширдини, наразивал къалуруналди, къейдна. “Яшамиш жезвай ва кIвалахзавай региондилай аслу тушиз, чи ватандашар вири барабар я”, – лагьана ада.

Зарарлубур кьабулдач

Россиядин таможнядин къуллугъчийри россиявийриз къецепатан уьлквейрай ракъурзавай ктабар вахчуда. И кар Евразиядин экономический союзди гьукуматдин итижриз, гьакI ахлакьдиз зарарлу материалар масанай гъун къадагъа ийизвай къарардал амална, кьилиз акъудда. Идакай “Коммерсантъ” чешмеди хабар гузва.

“Диндиз, сиясатдиз талукь тир басмадин изданияр таможнядин гуьзчивилин алава серенжемар кьабулунин объектар хьун мумкин я”, – хабар гузва чешмеди.

 

Ички гзаф ва тlимил

Ички ишлемишунин месэла Чукоткада, Магаданда, Ненецкий ав­тономный округда, Сахалинда ва Комида виридалайни хцидаказ ­акъвазнава. “IenIta.ru” чешмеди хабар гузвайвал, и кар “РФ-дин пиян тушир субъектрин милли рейтинг” ахтармишунрай малум хьа­на. “Пиян тушир Россия” проектдин винел пешекарри ахтармишунар кьиле тухванва.

Ички ишлемишзавайбурун кьадар Кировский, Владимирский ва Костромской областрани гзаф я. И регионра, ахтармишай пешекаррин делилралди, ички гзафни-гзаф жегьилри ишлемишзава.

Пиян тушир республикайрин жергеда Чечня, Ингушетия, Дагъустан, Карачаево-Черкесия ва Кабардино-Балкария ава.

Октябрдин вацра Zoom Market агентстводи чпин хсуси рейтинг туькIуьрнай. Абурун делилралди, Россиядин сергьятра виридалайни гзаф ички ишлемишзавай шегьер Саратов я. Кьвед лагьай чкадал Ханты-Мансийск ала.

Ругуд юкъуз – къумлухда…

Австралиядай тир дишегьлиди вич къумлухда ругуд юкъуз яшамиш хьайи агьвалатдикай ихтилатна. ABC News чешмеди малумарзавайвал, рехъ алатна, масанихъ акъатай  40 йисан яшда авай Брук Филлипсан машин къумлухда акIана. Кацихъ ва кицIихъ галаз сиягьатдиз фейи дишегьлиди эвелдай хаталувиликай са акьван фикирнач. Гьа сифте няниз ада вичив гвай зур литр яд хъвана куьтягьна. Гуьгъуьнин вад юкъуз ада макаронрин соусдикай ва машиндин шуьшеяр михьдай махсус цикай чара акуна.

Кьвед лагьай юкъуз адавай са тIимил марфадин яд кIватIиз хьана­. Чимивал лагьайтIа, ругуд юкъузни 30 градусдиз барабар тир. Машин­дин бензин куьтягь жедалди ада кондиционердикайни менфят къа­чуна.­

Недай затIарикай сиягьатчи дишегьлидив макаронрин соус, печенияр, са тIимил помидорар, лимондин миже ва малинадин сироп гвай. Амма гзаф кьуру тирвиляй адавай печенияр нез хьанач, абур адан туьтуьнилай фенач.

Филлипс адан 16 йисан яшда авай рушаз жагъана. Руша округдин агьалийрихъ галаз жагъурунин серенжемда иштиракзавай. Малум хьайивал, машин инсанар яшамиш жезвай чкадивай 30 километрдин яргъа авай. Гуьгъуьнлай духтурри сиягьатчидин гьал хъсан тирди къейдна.

Гуьлле гузва

Украинадин аскерри, жуьреба-жуьре яракьрикай, гьа жергедай яз залан тупарикайни менфят къачуналди, ДНР-дин инсанар яшамиш жезвай районриз цIай гузва. Идакай “Новости” РИА-ди хабардарна.

Украинадин гьукум 2014-йисуз ЛНР-диз ва ДНР-диз акси женгер тухунив эгечIнай. ООН-дин эхиримжи делилралди, къал-къиж, женгер себеб яз, цIуд агъзурдалайни гзаф инсанар телеф хьана.

Донбассда гьалар пайгардик кухтунин месэла са шумудра ве­ревирднатIани, кьве терефдин арада баришугъвал арадал хкуниз талукь  документар туькIуьрнатIани, ягъунар, цIай гун давам жезва.

Гьазурайди – Куругъли Ферзалиев


Всего просмотров: 40

Читайте также: