Дуьньяда

Хайи чlаларал рахун теклифнатIани…

Украинадин вице-премьер Геннадий Зубкоди Украинадинни Белоруссиядин регионрин форумдин иштиракчийриз анжах хайи чlалал рахун теклифна. Идакай “Новости” РИА-ди хабар гузва.

Вичин рахунрин сифте кьиле Зубкоди рикlел хкана хьи, гуьруьшдин вахтунда урус чlалакай менфят къачун кьетlнавай. Ада мярекатдин сергьятра аваз неинки экономикадин, гьакl культурадин жигьетдайни Украинадикай ихтилатиз кlанзавайди кьетlендаказ къейдна. “Жуван рахунар за хайиди тир украин чlалал ийизва ва белорус чlалал рахадай Белоруссиядин амадагрихъни за еке лезетдивди яб акалдай”, – лагьана Зубкоди.

Гьакl ятlани, Белоруссиядин патан иштиракчийри, гьа жергедай яз Минскда авай Украинадин векил Игорь Кизимани, урус чlалал рахун теклифна.

Къейд ийин, Белоруссиядинни Украинадин иштираквал авай международный форум 25-26-октябрдиз Белоруссиядин Гомель шегьерда кьиле фена.

Пиянбур яз гьисабда

Россиядин гьукуматди бедбахтвилин агьвалатар (авария) хьайи чкайрилай чуьнуьх хьайи шоферар пиябур яз гьисабдай ихтиярар гана. Рекьера гьерекат авунин  къайдаяр чlурунай жавабдарвал артухаруниз талукь законопроектар кьабулнава. Идан гьакъиндай премьер-министр Дмитрий Медведева малумарна.

Ада къейд авуна хьи, сифте нубатда ихтилат инсанрин сагъламвилиз зарар хьайи ва я кьиникьал гъайи ДТП-рикай физва.

“Улакь гьалзавай кас чуьнуьх хьайила, ам пиян гьалда авайни, авачирни, гьа кар дуьздаказ тайинариз хьун мумкин туш. Уголовный кодексдин исятда къуватда авай къайдайралди, ахьтин шофер пиян туширди яз гьисабзава, и карди тахсиркардиз кlеви жазадикай хкечlдай мумкинвал гузва”, – къейдна Медведева.

Адан фикирдалди, эгер арадал къвезвай авариядикди инсанар кьейитlа, тахсиркар шофердиз уголовный жаза гун герек я; эгер инсандиз хасаратвал тахьайтlа, административный къайдада жаза гуда. Законопроектриз талукь тир делилар 22-октябрдиз кабминдин сайтда чапна.

Насигьатар гана

Россиядин гьукумди вичин политикада квез фикир гун герек ятlа, гьадан патахъай милли хатасузвилин месэлайрин рекьяй США-дин президентдин меслятчи Жон Болтона ихтилатна. Идакай Reuters чешмеди малумарнава.

“Эгер абуру” (урусри) чи сечкийрик къаришмиш хьунин гьерекатар акъва­зарайтlа, Украинадин Крымдай ва Донбассдай экъечlайтlа, Рагъакlидай пата къадагъа алай химиядин яракьар ишлемиш тавуртlа, хъсан жеда”, – малумарна Америкадин регьбердин меслятчиди.

Болтона Россиядиз акси яз кьабулдай серенжемрикай талукь тир ксариз баян гана. 2015-йисуз Сириядин регьбер Б.Асадан тlалабуналди Россиядин ВКС-ри кьиле тухвай женгинин гьерекатриз Вашингтонди акси къимет гузва. США-ди гуя чпин сечкийрик къаришмиш хьанва ва Солсберида химиядин яракь ишлемишнава лугьуз,  Россиядик тахсирар кутазва. Вашингтонди 2014-йисуз Крымда кьиле фейи референдумдин нетижаярни гьисаба кьазвач. Гьа са вахтунда Россиядин терефди США-ди раижзавай хабарар бинесузбур тирди къейд­зава.

Телефонди тупlар гацумарна

Са шумуд юкъуз галаз-галаз мобильный телефон гъиляй акъуд тавуникди Китайдин Чанша шегьердин дишегьлидивай тупlар акlажариз хъхьанач. Идакай Shanghaiist чешмеди малумарзава.

Кlвалахдикай ял ягъун патал дишегьлиди гьафтедин рухсат къачуна. Ахвара хьайи вахт квачиз, амай вири вахт ада гъиле телефон аваз акъудна. Са шумуд йикъалай адан эрчlи гъилин капаш тlар хьана, тупlар лагьайтlа, гацум хьана, юзуриз-акlажариз жезмачир. Къалабулух акатай дишегьлиди духтурдин патав фин кьетlна. Адан тупlарин дамарриз пис таъсирнавай. Духтурди сагъар хъувурдалай кьулухъ тупlар адетдин гьалдиз хтана. Ихьтин гьал мад тикрар тахьун патал духтурди адаз гележегда телефон яргъалди гъиле кьун тавун, яни гъилив ял ягъиз тун теклифна­.

Багьа боксер

Чечнядин кьил Рамзан Къадирова малумарнавайвал, америкави боксер Флойд Мэйуэзеран ва какахьай женгерин спортсмен Гьабиб Нурмегьамедован арада Россияда бягьс тешкилиз хьун мумкин туш. Идакай ТАСС-ди хабар гузва.

“Гьакъикъатдани, неинки Грозныйда, гьакl Россиядани бягьс кьиле тухуз жедач. Мэйуэзер виридалайни багьа спортсмен, риваятдиз элкъвенвай боксер я. Гьабибни какахьай женгерай лап хъсан спортсменрикай сад я. Мэйуэзер Россиядиз атун ва бягьс кьиле тухун патал агъа кlанинди 200-250 миллион доллар герек жеда, ихьтин такьатар чина гьелелиг ганвач”, – къейдна Къадирова.

Мадни, спортсменрин арада женг кьиле финикай авай ихтилатар Къадирова реклама патал ийизвайбур яз гьисабзава. “Гьабиба адахъ галаз боксдин къайдайралди бягьс бажагьат тухуда. Гьабиб садрани магълуб хьанвач, адаз и магълубвал герек яни?!”, – алава хъувуна ада.

Къейд ийин, 14-октябрдиз Нурмегьамедова Мэйуэзераз бягьс тухун теклифна. Мэйуэзера боксдин къайдада Нурмегьамедовахъ галаз гьасирдал экъечlунал разивална. Ада къейдна хьи, ихьтин бягьс Лас-Вегасда кьиле фин лазим я. Россиявиди лагьайтlа, бягьс Москвадин “Лужникида” тухуз жедайди лагьана.

Нурмегьамедова санлай 27 бягьс (ММА) тухванва ва садрани магълуб хьанвач. 41 йисан яшда авай боксер Мэйуэзерни садрани магълуб хьанвач – адахъ 50 гъалибвал ава.

Гьазурайди – Куругъли Ферзалиев


Всего просмотров: 40

Читайте также: