Духтур-алим

Хкягъай пешеда, илимда гьа сифтедилай тафаватлу хьайи пешекарриз гележегда регьят жеда. Чеб машгьур, нуфузлу хьунилай гъейри, абурун алакьунарни тежриба себеб яз жемиятдизни еке хийир жеда.

Алай вахтунда Ярославль шегьерда яшамиш жезвай  Рагьмалиев  Гуьлмет Исмаиловични  чарадан дердидикай хабар кьадай, куьмек герек хьайи инсан вичелай алакьдайвал четин гьалдай акъудиз алахъ­дай пешекар духтуррикай сад я. Ада Ярославлдин госмедакадемиядин хирургиядин кафедрада кlвалахза­ва; ам медицинадин илимрин кандидат я.

Г. Рагьмалиев 1974-йисуз Сулейман-Стальский районда дидедиз хьана. 1991-йисуз мектеб ва 1994-йисуз медицинадин колледждин стоматологиядин факультет тафаватлудаказ куьтягьна.

“Илимрикай, шак алачиз, медицина виридалайни пакди я”, – лагьанай Гиппократа. Пак илимдин деринриз гьахьунин ният рикlе авай Гуьлмет Рагьмалиев медколледж куьтягьна акъвазунал рази хьанач. Икl, 2001-йисуз ада Ярославлдин госмед­академиядин (ЯГМА) педиатриядин факультет ва гуьгъуьнлай и вузда хирургиядин­ кафедрада хирургиядин рекьяй клиникадин ординатура, 2006-йисуз гьа и кафедрада очный къайдада аспирантура куьтягьна, “Временная окклюзия бронхов в лечении нагноительных заболеваний легких и плевры” темадай медицинадин илимрин кандидатвилин диссертация хвена.

Г.Рагьмалиева алай вахтунда ЯГМА-дин­ хирургиядин кафедрада ва 4-нумрадин азарханадин поликлиникада аялрин сарарин духтурвиле кlвалахзава. Пешедин р­е­кьяй­ ада илимдин хейлин кlвалахар кхьенва­.

Гуьлмет Рагьмалиев, авай чкадилай ас­лу тушиз, халкьдин меденият, адетар ви­лик тухузвай, абурал амалзавай векилрикай сад я. Ам Ярославлдин лезгийрин милли медениятдин автономиядин (ЯРЛНКА) активист я.

ЯРЛНКА-дин руководитель, чи ватан­эгьли Васиф Гьасанова Гуьлмет Рагьмалиеван гьа­къиндай ингье вуч лугьузватlа: “Гуьлмет духтур ина лезгийрин, дагъустанвийрин ва вири кавказвийрин махсус “тади куьмек” я. Йиф-югъ лугьун тавуна, Гуьлмет­ Исмаилович начагъ касдин кьилив сифте агакьзавайбурукай сад я. Азарханада начагъ кас дири хъувун патал ада вири кlва­чел къарагъарда, кlвалах гьакъисагъвилелди кьилиз акъуд тавунмаз ам хъфидач­. ЯРЛНКА-ди кьил кутазвай мярекатра да­тlана иштиракзавай, гьар са кардик вичин пай кутазвай ватанперес инсанни я. Ихьтин ксар чахъ гзаф хьурай!”.

Гьазурайди – Куругъли Ферзалиев


Всего просмотров: 18

Читайте также: