Дигидай яд хьанайтIа, бегьерни артух жедай

И йикъара Кьурагь райондин информациядинни технологийрин ва печатдин центрадин къуллугъчийри М.Жабраилован «Бумеранг» тIвар алай хуьруьн майишатдин тешкилатдал ва Ф.Жабраилован КФХ-дал кьил чIугуна.

«Лезги газетдиз» муниципалитетдин пресс-къуллугъди хабар гайивал, Фаик Жабраилов кьиле авай КФХ-дихъ 8 гектардин багъ ава. Багъ цIийиди хьуниз килигна, алай йисуз ада чIулав хутарин ва алучайрин 1 тонн бегьер гана.

«КIватIай бегьер чна чкадал халкьдиз маса гана. Гатфарин вахтунда мекьивилер ва герек чIавуз дигидай цин патахъай дарвал хьайивиляй артух бегьер къачуз хьанач», — къейдна фермер Ф.Жабраилова.

М.Жабраилован «Бумеранг» майишатдихъ 25 гектардин майдан кьунвай алучайринни чIулав хутарин багъ ава. И багъди гайи 10 тонн бегьерни чкадин халкьдин арада маса гана.

Къейдна кIанда хьи, дигидай целди таъминарунин месэла, алатай йисара хьиз, алай йисузни хцибурукай сад хьана. Кьуьчхуьррин администрациядин кьил Аскер Жабраилова къейд авурвал, Бугъдатепединни ЦIийихуьруьн рекье къир цун ва и хуьруьн мулкар тамамвилелди дигидай целди таъмин тавунмаз зурба агалкьунрикай рахаз жедач.

«Лезги газет»


Всего просмотров: 31

Читайте также: