Дидейрин югъ къейдна

Экуь тир дуьньядин винел виридалайни пак, чими, мукьва, багьа, истеклу, милайим гаф — им “ДИДЕ” я. Дидеди гьамиша чи уьмуьрдин рекьел гуьзчивал тухузва. Лап кьуьзуь жедалди ри­кlин кlанивилин чимивал гузва. Дидедин зегьмет рикlелай ра­къурдай, дидедин кефи хадай велед тахьун лазим я.

Диде! Чун гьар сад дуьньядал акъудай, чаз уьмуьр гайи михьи кас! Чи уьмуьрда жезвай вири къени ва гуьзел крар сифтени-сифте адан тlварунихъ галаз алакъалу жезва. Инсандин гьикьван яшар хьайитlани, адаз диде герек къвезвайди я. Чпин мегьрибанвилелди,  мергьяматлувилелди, камаллувилелди, зегьметдал рикl хьуналди дидейри чи уьмуьрда кьетlен чка кьазва.Гьикьван хъсан ва регьимлу гафар лагьайтlани чи дидейриз, абур артуханбур жедач.

Чи Кумухърин юкьван школа — бахчада Дидейрин югъ къейд авун адетдин мярекатдиз эл­къвенва. Ихьтин мярекатар тухунин макьсад ам я хьи, аялриз тер­бия гунин карда, дидедин хатур хуьн, адаз къимет гун, ди­де­­диз­­ кlанивал къалурун школада, бахчада гьевес кутазвай кьилин месэлайрикай сад я. Бахчада кьи­­ле фейи мярекатдин программадик аялри гьазурнавай жуьреба-жуьре конкурсар,  къугъунар, кьуьлер, шиирар квай. Бахчадин зал, дидейриз бахшна аялри чlу­гунвай шикилралдини, портретралди безетмишнавай. Абур теш­килунин ва мярекат тухунин  карда тербиячияр тир Абдулкеримова Раидади ва Балаэфендиева Гьалимата куьмек гана.  Гьелбетда, мярекатда теклифнавай дидейрини иштиракна. Аялри­ чпин дидейриз  и  югъ хушвилин, шадвилин гафаралди тебрикна. Эхирдай тербияламишзавайбуруз ширинлухрин стол ачухна ва гъа­либ хьайибуруз пишкешар, грамотаяр гана. Гьи­кьван сан-гьисаб авачир кьван хвешивилин хъвер, гьикьван шадвилин нур къекъвезвай аялрин вилера, чпин дидеярни къвалав гваз хьайила.

Школадани Дидейрин югъ кьиле тухунин мураддалди ­“Ди­­дей­рин гьафте” малумарнавай. Школада дидейриз бахшнавай жуьреба-жуьре конкурсар кьиле фена.  Классрин регьберри классдин сятер тухвана, аялрин дидейриз теклифуналди, чай хъвадай столар ачухна. Аял­ри чпин гуьзел, играми, багьа тир ди­дей­риз Дидейрин югъ мубаракна, муаллимри мугьманриз чух­са­гъул лагьана, сувар тебрикна. Конкурсра тафаватлу хьайибуруз, жюриди нетижаяр кьуналди, вири школадин линейкадал пишкешар, грамотаяр гана. Тешкилай, иштирак авур вири ксариз школадин  директор З.М.Абдулкеримова сагърай лагьана, Дидейрин югъ мубаракна.

Д. Магьамадалиев

 


Всего просмотров: 75
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире