Давам жезва

И мукьвара Сулейман-Стальский райондин кьил Нариман Абдулмуталибов райадминистрациядин жавабдар работникар галаз РД-дин Кьил Владимир Васильеван “150 школа” проектдин сергьятра аваз  худда ремонтдин кIвалахар кьиле физвай ДаркIуш-Къазмайрин  СОШ-диз ва “Алай аямдин шегьердин шартIар”  программадин кIвалахар давам жезвай ЦIийи Макьарал фена. 

ДаркIуш-Къазмайрин юкьван умуми обра­зованидин школади Дагъустан Республикадин Кьилин проектда иштиракиз кьвед лагьай­ йис я. Школадин материалринни технический гьал хъсанарун ва ремонтдин кIва­лахар кьиле тухун патал Республикадин ва муниципальный бюджетрай ахъайнавай такьатрилай гъейри, алатай ва гъилевай йисуз  школадиз “Рычал-су” ОАО-ди куьмекар гузва­. Алай вахтунда умуми образованидин ида­ра­да классрин къавар туькIуьрунин, да­кIарар дегишарунин кIвалахар авуна куьтягьзава. Райондин кьил Нариман Абдулмутали­бова пудратчидиз кIвалахар кIелунин цIийи йис баш­ламиш жедалди куьтягьуниз эвер гана.

Школадин багъдиз фейила, Нариман Абдулмуталибов, адал алай гьал акурла, нара­зи яз амукьна ва умуми образованидин идарадин руководстводал участок зирзибилдикай михьун ва ам тарсар башламишдалди къайдадиз хкун тапшурмишна.

Ахпа райондин кьил  “Шегьердин къулай шартIар туькIуьрун” программадин сергьятра аваз ЦIийи Макьарин хуьруьн Ленинан тIва­рунихъ галай куьчеда авай сквер  туькIуь­рунин кIвалахар кьиле физвай гьалдихъ галаз­ таниш хьана. Участокдин майдан 2830 квадратный метрдиз барабар я. Паркуна “Гъам чIуг­вазвай диде” памятник эцигда. Алай вахтунда­ объектдал тротуардин плитка тунин ва жугъу­нар туькIуьрунин кIвалахар кьиле физва.

«Лезги газет»


Всего просмотров: 26

Читайте также: