“Даим элдин меле авай…”

Физовудин  Нежведилович  Шагьпазов.  Ери-бине Сулейман-Стальский райондин Кьулан СтIалрилай тир и кас Да­гъус­танда гзафбуруз чида. Сифте нубатда, женгчи-интернационалист хьиз. Афгъанистан Республикада интернационалистдин буржи тамамарунай Физовудин Шагьпазов “Женгчи-интернационалист” ва СССР-дин Верховный Советдин Президиумдин грамотайриз лайихлу хьана­.

Мукьвара ада вичин 60 йисан юбилей къейднава. 60 йисан яшар уьмуьрдин аламатдин легьзейрикай сад я. И кукIушдив агакьай гьар са касди жуьреба-жуьре вакъиайрив ацIанвай алатай йисар рикIел хкида, цIийи планар туькIуьрда.

Физовудин Шагьпазова вичин уьмуьр лайихлудаказ кьиле тухузва. Инсанрин патай къазанмишнавай гьуьрмет ада вичин виридалайни еке агалкьун яз гьисабзава. Военный къуллугъдин ва дяведин инвалидрин Дагъустанда авай тешкилатдин векил тир Ф.Шагьпазов РД-дин МЧС-дин “Хайи Дагъустандиз сав­кьат” тIвар алай гимндин чIа­ла­рин автор я. Гимн жуьреба-жуьре дуьшуьшрик акатай инсанар къутармишзавай, датIа­на халкьдин хатасузвилин къуллугъда акъвазнавай вишералди кьегьалрин рикIин эмирдиз элкъвенва.

Лагьана кIанда, Ф.Шагьпазова республикадин общественный уьмуьрдани активнидаказ иштиракзава. Ам Махачкъала шегьердин администрациядин патав гвай агъсакъалрин Советдин президиумдин член я. Адакай са вахтунда РФ-дин Госдумадин депутатвиле кандидатни хьанай…

Чи ватанэгьлидиз гзаф хъсан ерияр хас я. Ам вичин хивевай бур­­жийрив намуслувилелди эгечI­­­да, жавабдарвал сифте чкадал эцигда. Жуьреба-жуьре къул­лугъар тамамарунин карда ада гьамиша и ерийрал амалз­а­ва­.

КIевевай касдиз куьмек гун, гъвечIи-чIехидаз гьуьрмет авун, за­­­хавал, къенивал, сабурлувал, ва­танпересвал… — ибур Физову­дин­ Шагьпазован къилихдин безекар я.

Чна Физовудин Нежведиловичаз 60 йисан юбилей рикIин сидкьидай мубаракзава ва адаз ихьтин чIалар бахшзава:

Вичихъ ери-бине авай,

Камаллу кьил вине авай,

Гьахълувилин кIвенкIве авай,

Мизан-терез гъиле авай

Инсан я вун, Физовудин.

Халкьдин дердер рикIе авай,

ЧIехи крар хиве авай,

Даим элдин меле авай,

Экуь нурар пеле авай

Аслан я вун, Физовудин.

Мубаракрай хайи югъ ваз —

Пудкъад йисан гурлу аваз.

Сагъ чан хьурай, гуьгьуьлни — саз,

Виш йисар хьуй хизан галаз,

Лукьман я вун, Физовудин.

Ви сагълугъдай хъвада вишер,

ЧIулав гьерен яда шишер,

Чи дуствилин лезги кесер

Хуьз алакьдай я вун аскер.

Са чан я вун, Физовудин.

И чIал кхьей Пирмегьамед,

КIани кас я дуьньяда гьахъ.

Бахт я хьун дуст вун хьтин захъ.

Итимвал хуьз я вун яракь,

Виждан я вун, Физовудин.

 

Анна  Керимова,

“Дагъустандин уьмуьр” газетдин мухбир


Всего просмотров: 85
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире