“Дагъустандини” иштиракда

Дагъустандин физический культурадин ва спортдин министерстводин сайтда хабар ганвайвал, волейболдай республикадин хкянавай командади  Россиядин командайрин арада кьилин “Б” лигадин чемпионатдин цIийи сезонда иштиракда.

— Россиядин чемпионатда иштиракун патал волейболдай Дагъустандин хкянавай командадини малумарнава. И йикъара тренерри командади тренировкаяр кьиле тухуниз талукь месэлаяр веревирдна, — хабар гана командадин кьилин тренер Мегьамед Гаирбегова.

Адан гафарай мадни малум хьайивал,  цIийи сезон ачухдалди Дагъустандин волейболистри­, адетдиз элкъвенвайвал, сифтедай Расул Гьамзатован экуь къаматдиз бахшнавай турнирда иштиракда. Ам алай йисан сентя­брдиз Махачкъалада, Е.Исинбаевадин тIва­ру­нихъ галай волейболдин центрада, кьиле фида.  Гьа ина чи командади кIвалин  къугъунарни кьиле тухудайвал я.

— Алай вахтунин команда чкадин спортсменрикай ибарат я. Асул гьисабдай яз ана Даггос­университетдин студентар къугъвада. Командадиз школада кIелзавай са шумуд аял гъунни планрик ква,  жегьилар жезмай кьван гзаф желбда. Чи командадик кваз кьилин “А” лигада къугъвай 3 касдилай гъейри, мад кьвед Грозныйдин командада къугъун патал хъфена. Эгер пулдин такьатар авайтIа, абур чи командада амукьун мумкин тир. Белки, гележегда абур хкиз алакьда, — къейдна М.Гаирбегова.

РикIел хкин: пулдин такьатрихъ галаз ала­къалу месэлаяр себеб яз алатай сезонда “Да­гъустан” командадивай Россиядин кьилин “А” лигадин чемпионатда къугъваз хьаначир.

Чи мухбир


Всего просмотров: 16

Читайте также: