«Дагъустандин дишегьли» журналдин 3-нумра акъатнава

“Дагъустандин дишегьли» журналдин 3-нумра чапдай акъатнава. Адан жилдинал Дагъустандин госфилармониядин художественный руководитель, РД-дин искусствойрин лайихлу деятель Ирина Нахти­галан шикил ала. Виолетта Ратенковади вичин очеркда Ирина Герма­новнадин музыкадиз бахшнавай уьмуьрдикай, къенин юкъуз филармония авай гьалдикай ихтилатзава­.

“Тек са уьмуьр тIимил я чаз…” кьил ганвай макъалада вири уьлкве­диз машгьур Алкьвадар Гьасан эфен­дидин тухумдай тир тежрибалу­ муаллим, краевед Нурият Имамовна Алкадарскаядикай суьгьбетзава.

Игит дидедин ордендин ва гьукуматдин маса наградайрин сагьиб­, зегьметдин ветеран, 12 аял чIе­хи авур къайгъудар диде  Кевсер Ашуровади гзаф аялар авай хизанда гьи месэла хьайитIани гьялиз регьят тирди субутзава.

Литературадин чинар лезги тарихдин дамах тир СтIал Сулейманаз ва  ам машгьур авурбурукай сад тир Эффенди Капиеваз бахшнава.

Булач Гьажиев себеб яз чав Да­гъустандин тарихдин чинар, шикилар, суьретар, кьетIен меденият агакьна. Журналда  Хуна хуьряй тир кьегьал руш Партудин кьисметдикай  ихтилат физва.

Зурба шаир СтIал Сулейман ди­дедиз хьайидалай инихъ 150 йис тамам хьунихъ галаз алакъалу яз адан уьмуьрдин жуьреба-жуьре девирар къалурзавай  аялри чIугун­вай шикилар журналдин 16-чинай аквада.

Квез чидани? Кеферпатан Кавказда хашпарайрин виридалайни чIе­хи ибадатхана — “Знаменидин ки­лиса” Хасавюртда ава. “Зи Да­гъус­тан” рубрикади куьн и  килисадин тарихдихъ галаз танишарзава.

Журналдин 29-чина вичин хивез виридалайни важиблу ва баркаллу везифаяр (дидевилин, бадевилин) къачур дишегьли, “Игит ди­де” ордендин сагьиб Шагьрузат Ра­мазановадикай ихтилатзава.

И ва маса итижлу макъалаяр “Да­­гъустандин дишегьли” журналдин 3-нумрадай кIелиз жеда.

Чи мухбир


Всего просмотров: 25

Читайте также: