Дагъустанда алава поездар кардик кутунва

Алатай ислен йикъалай (8-апрелдилай)  Дагъустандин мулкунал шегьеррин арада ракьун рекьяй гьерекатдай алава жуьт поездар кардик кутунва. Республикадин транспортдин ва рекьерин майишатдин министерстводи хабар гузвайвал, алава поездри  “Махачкъала-Хасавюрт-Махачкъала” ва “Дербент- Азербайжандихъ галаз сергьят — Дербент” маршрутра гьерекатда.

“Къе “Махачкъала-Хасавюрт” ва “Дербент-Азербайжандихъ галаз сергьят” терефрай шегьеррин арада ракьун рекьяй гьерекатдай алава жуьт поездар кардик кутунва.  Шегьеррин арада ракьун рекьин транспортдин кIвалах гуьнгуьна тунин месэладиз, республикадин агьалийрин тIалабунар гьисаба кьуна, Дагъустандин Кьил Владимир Ва­силь­ева  парламентдиз рекье  тур Чарче  фикир ганай”, —  лагьана министерстводин­ векилди.

Адан гафаралди, шегьеррин арада гьерекатдай алава поездар кардик кутунин месэла  республикадин минстрансди  “Кеферпатан Кавказдин  шегьеррин арада пассажирар санай масаниз тухунал машгъул компания” АО-дихъ галаз санал гъиле кьунай. Ми­нистерстводин векилди хабар гайивал,  эхиримжи йисан вахтунда, республикадин ракьун рекьин транспорт ишлемишиз, санай ма­саниз физвай пассажиррин кьадар тахминан кьве сеферда артух хьанва.

“Агьалийри шегьеррин арада къекъвезвай поездрикай менфят иллаки ял ядай йи­къа­ра къачузва.  Мадни къулайбур  тир  алава­ поездар кардик кутунин нетижада  пассажиррин кьадар генани гзаф жеда, вучиз лагьайтIа поездрин расписанида, пассажиррин  теклифар фикирда кьуна, дегишвилер твадай мум­кинвал ава”, —  алава хъувуна ада.

Республикадин шегьеррин арада гьар юкъуз гьерекатзавай поездрин  расписание чна агъадихъ ганва:

“Махачкъала-Хасавюрт” —  9:10 ва 17:40

“Хасавюрт-Махачкъала” —  8:01 ва 15:44

“Махачкъала-Дербент” —  9:00, 17:30 ва  20:09

“Дербент-Махачкъала” —  6:10, 8:58  ва 15:33

“Дербент-Хасавюрт” —   13:30

“Хасавюрт-Дербент” — 11:39

“Дербент-Сергьят”  —  6:00, 13:00  ва 18:17

“Сергьят-Дербент” —   8:43, 15:46 ва  21:04

Расписанида къалурнавай вахтар дегиш хьун мумкин я.

Чи мухбир


Всего просмотров: 36

Читайте также: