Дагъустан-Иран: амадагвилин алакъаяр

РД-дин Кьилин ва Гьукуматдин Администрациядин пресс-къуллугъди “Лезги газетдиз” хабар гайивал, алатай гьафтеда Дагъустандиз Россияда Ирандин тамам ихтиярар ганвай Векил Мегьти Санаи кьиле авай делегация мугьман хьанвай.

Махачкъалада Векил Дагъустандин Кьил Владимир Васильевахъ галазни гуьруьшмиш хьана. Гуьруьшдин вахтунда абуру Дагъустандинни Ирандин арада жуьреба-жуьре хилерай алакъаяр веревирдна. Мисал яз, — АПК-дин хел. Алай йисуз дагълух республикадин хуьруьн майишатдин суьрсет гьасилзавайбуру Ирандиз 900 тонндив агакьна лапагдин як агакьарнава. Иранда и суьрсетдихъ авай игьтияж къвердавай артух жезва, яни гележегда къецепатан уьлкведиз маса гузвай метягьдин кьадарни гзаф жеда.

Мегьти Санаиди, авай мумкинви­лерикай менфят къачуна, Дагъустандинни Ирандин арада алишверишдинни экономикадин жигьетдай амадагвилин ала­къа­яр еримлу авуниз эвер гана. Ада и кар­диз­ республикадин руководстводи кье­тIен­ фикир гудайдак ва Да­гъустандин­ мул­карал карчивилел машгъул хьун па­тал­ Ирандин инвесторар желбдайдак умуд кутуна. Ада гьакIни Ке­ферпатан Кав­­каздин республикада Ирандин ме­тягь­рин махсус выставка кьиле тухунин ва гележегда ина Ирандин алишверишдин кIвал арадал гъунин теклифарни га­на.­

Владимир Васильева теклифрин тереф хвена ва Гьукуматдал и месэладин винел кIвалахун тапшурмишна.

Транспортдинни логистикадин комплексдикай рахадайла, Мегьти Санаиди къейд авурвал, Ирандин инвесторриз Махачкъаладин алишверишдин гьуьлуьн порт вилик фин ва адакай гележегда менфят къачун итижлу я.

“Санлай къачурла, Дагъустанди Россиядинни Ирандин арада метягьар са уьлкведай маса уьлкведиз тухунин карда кьетIен роль къугъвазва. И карда республикадин иштираквал 30 процентдиз барабар я. Эгер чна гьуьляй ва кьураматдай алакъаяр мягькемарайтIа, и процент са шумуд сеферда хкаж хьун мумкин я”, — алава хъувуна Векилди.

Гуьруьшдин сергьятра аваз, терефри гьуьлуьн круиздин ва яхтайрин туризмдиз талукь проектар санал кьилиз акъудунихъ еке метлеб авайди къейдна. Идалай гъейри, Махачкъаладин ва Тегерандин арада авиаалакъа кардик кутунин месэлани веревирдна.

Владимир Васильев ва Мегьти Санаи гуьруьшдин вахтунда къарагъарай вири месэлайрин винел тамамдаказ кIва­лахдай, амадагвилин алакъаяр мягь­кемардай фикирдал атана.

“Чун вири рекьерай алакъаяр хуьз гьазур я. Куь теклифар гьихьтинбур ятIа, чаз чир хьанва. Чна абур веревирдда…”, — лагьана Дагъустандин Кьили.

«Лезги газет»


Всего просмотров: 22

Читайте также: