Дагълар муьтIуьгъариз…

Гьар са инсандиз вичин рикI алай кардал маш­гъул­ жез кIан жеда. Бе­гьем фикир тагунин ва я гъа­латI хьунин нетижада маса пеше хкягъайтIани, ри­кIин майилди инсан вичиз муь­тIуь­гъарда. Чи жегьил ватанэгьли  Анзор  Агъамирзоевни  вичиз хуш кардал пешекарвилелди, жемият патал менфятлувилелди машгъул хьанвай шикилчи я.

Ам 1995-йисуз Мегьарамдхуьре дидедиз хьана. Мектеб куьтягьайдалай кьулухъ юриспруденциядин рекьяй Дондал алай Ростов шегьердин университетдик экечIна. Амма са кьадар чIавалай ам юриствал вичин пеше туширдан гъавурда акьуна. Ихьтин фикирдал атай жегьилди вичиз вуч итижлу ятIа, гьа рехъ хкядай къарар кьабулна.

“Жуван фикирдик квай, рикI алай кар кьилиз акъатун патал гьар са жегьил сифте нубатда вич вичихъ агъун герек я. Майилвилери гьинихъ ялзаватIа, гьа рекьихъ фин лазим я. Нетижаярни гьерекатрилай аслу жеда”, — ибретлу меслят къалурзава жегьил шикилчиди.

Шикилар ягъунал ам гьеле вуздин 2-курсуна кIелдай чIавалай (2014-й.) машгъул я. Сифтедай ада, вири шикилчийри хьиз, вичиз акур, вич фейи чкайра жуьреба-жуьре шикилар язавай. Гуьгъуьнлай шикилар ягъунал ам Дагъустанда машгъул хьана. Да­гъустандин ажайиб тIебиатдиз гила шикилчидин вилералди килигай жегьилдик хайи ерийрин шикилар чIугвадай ашкъи акатна. Нетижада ада вичин танишриз, дустариз, гьакI вири уьлкведиз Дагъустан къалурна.

Гуьгъуьнлай ам неинки тIебиатдин шикилар ягъиз­, гьакI мукьувай такур пипIериз сиягьатриз физ гатIунна. Сиягьатчивилерал, шикилчивилерал ва туриствилерал рикI алай итижлу инсанрихъ галаз таниш хьайидалай кьулухъ ватанэгьлидиз Кьиблепатан Дагъустанда туриствал вилик тухунин инфраструктурадин гьалар хъсанзавачирди чир хьана. Амма бегенмиш тежедай хьтин гьалари жегьил пешекардиз вичин рикI алай тешкиллувилин кардал машгъул хьуниз манийвал ганач.

Анзор Агъамирзоева къейдзавайвал, четин месэлайрикай сад чи ерийра туристар патал мугьманрин кIвалер кьит хьунихъ галаз алакъалуди я. Адан фикирдалди, туриствилин хел вилик тухун патал чка­дин агьалийри чарасуз шартIар тешкилнавай мугьманханаяр, кIвалер арадал гъун герек я.

Шикилчидихъ галаз авур суьгьбетдай малум хьайивал, дагълух бязи хуьрера мадни четин месэлайрал ацалтзава. Кьилди къачуртIа, агьалийриз туристар-мугьманар кьабулиз кIан жезвач, гьатта пул теклифайлани, бязибур рази жезвач. Гьелбетда, им дагъвийри чпиз хас тир мугьманпересвилин адетар къуватдай вегьенва лагьай чIал туш. Аквадай гьаларай, гагь-гагь ацалтзавай ихьтин дуьшуьшарни, винидихъ къейд авурвал, гзаф мугьманар санал кьабулдай мумкинвилер тахьунихъ галаз ала­къалу я.

Къейд ийин, алай вахтунда Анзор Агъамирзоев Москвада яшамиш жезва ва ана вичин пешедин рекьяй чирвилер артухарзава.

“Инсанриз Кьиблепатан Дагъустандин гьар са пIипI итижлу я, абуру чи республика махарик жедай хьтин суьгьуьрлу чкадив гекъигзава. Гьа са вахтунда гзафбуруз Дагъустандиз къвез кичIезва”, — лугьуз­ва Анзора.

Анзорахъ гележегда туризм вилик тухудай ниятар ава. Адан фикирдалди, туриствал вилик тухуни дагълух хуьрер кIвачел ахкьалдарда. Хийирлу кардал машгъул ватанэгьлидихъ къуй агалкьунар хьурай!

«Лезги газет»


Всего просмотров: 110
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире