ЦIийи йисаз бахшна

И йикъара Махачкъалада, автомобилринни рекьерин колледждин спорткомплексда, 2004-2005- йисара дидедиз хьайи жаванрин арада боксдай турнир  кьиле фена. Са шумуд юкъуз да­вам хьайи и серенжемда 200-далай виниз спортсменри заланвилин 13 категориядай чпин устадвал къалурна. Къейд авун лазим я хьи, жаван спортсменар иниз Кеферпатан Кавказдин саки вири регионрай, гьакIни Астрахандин, Дондал алай Ростовдин, Саратовдин ва Белгороддин областрай атанвай.

Турнир ачухуниз талукьарнавай шад мярекатда Дагъустан Республикадин Кьил Владимир Васильева, РД-дин Гьукуматдин Председатель  Артём Здунова, Дагъустандин физический культурадин ва спортдин рекьяй министр Мегьамед Мегьамедова, боксдин федерациядин президент, чи ватандаш Альберт Селимова, республикадин машгьур спортсменри, гьа гьисабдай яз Олимпидадин къугъунрин чемпионрини призёрри, гьакIни боксдал рикI алай гзаф ксари иштиракна.

— ЦIийи йисан вилик кьиле тухузвай турнирдин иштиракчияр ва мугьманар! Россияда, гьа гьисабдай яз Дагъустандани, бокс вилик тухун патал тIимил зегьметар чIугвазвач. Къенин мяре­катдини и кардин гьакъиндай шагьидвалзава. Чна Дагъустандин спортсменри боксдай дуьньядин чемпионатда са тIимил вахт идалай вилик къазанмишнавай агалкьунрал — Муслим Гьажимегьамедован ва Зенфира Мегьа­медалиевадин къизилдин кьве медалдал дамахзава. Нубатдин сеферда кесерлу акъажунра чи спортсменрин гьуьрметдай Россиядин гимн тамамарна. Ихьтин агалкьунри неинки Дагъустан, гьакIни Россия машгьурзава, — къейдна мярекат ачухай  В.Васильева.

Алукьзавай ЦIийи йисуз, спортда мадни еке агалкьунар хьун алхишунихъ галаз сад хьиз,  ада республикадин спорт вилик тухуник еке пай кутур­ ксарив шабагьар вахкана. ИкI, Европадин чемпион (1985-йис), дуьньядин Кубокдин сагьиб­ (1985-йис), Олимпидадин къугъунрин призёр (1988-йис), дуьньядин чемпионатдин призёр (1989-йис), СССР-дин спортдин лайихлу мастер (1989-йис) Нурмегьамед Шановазоваз “Дагъустан Республикадин вилик лайихлувилерай” орден гана. Россиядин спортдин международный классдин мас­тер Жамбулат Бижамов “Дагъустан Республикада физический культурадин ва спортдин хиле агал­кьунрай” медалдиз лайихлу хьана. Боксдай са жерге тренеррин­ зегьмет гьуьр­метдин грамотаяр гуналди къейдна. Шад мя­ре­кат­ Дагъустандин халкьдин артистка Рукъият Гьам­затовади манияр лугьуналди ва “Ватан” ансамблди кьуьлер тамамаруналди мадни гурлу хьана.

Гуьгъуьнлай жаван боксёрри рингда чпин устдвал къалурна.

Рагнеда Рамалданова


Всего просмотров: 103
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире