Чкадал килигна

РД-дин Гьукуматдин Председатель Артем Здунован тапшуругъдалди Дагъустандин районрани шегьерра яшайишда арадал къвезвай кIеви амукьаяр кIватIунин ва махсусдаказ тайинарнавай чкайриз акъудунин месэладай республикадин дережадин гьакимрин иштираквал аваз совещанияр кьиле тухузва.

15-ноябрдиз РД-дин вице-премьер Абдулмуслим Абдулмуслимова РД-дин тIе­би­­атдин ресурсрин ва экологиядин минис­терстводин векилрихъ ва региональный оператордихъ галаз санал и месэладай Мегьарамдхуьруьн райондин администра­циядин залда муниципалитетдин хуьрерин кьилерихъ галаз  совещание тухва­на.­

Совещание ачухай Мегьарамдхуьруьн райондин кьил Фарид Агьмедова къейдна: «Районда санитариядин гьалдиз талукь месэладиз чна гьамиша кьетIен фикир гузвайди я, райондин мулкарал михьивилерал амал авунин къайдайриз чна кIе­велай итиж ийизва. Чун и кIвалах районда лазим тир дережада тухуз алахъзава. Кьиблепатан территориальный округдин амай чкайра хьиз, чи райондани зирзибил кIватIунин ва ам махсусдаказ чара авунвай чкайриз акъудунин месэлайрал “Экологи-Ка” ООО машгъул жезва.

“Региональный операторди зирзибилдикай михьи авунин месэлайрай хуьрерин кьилерихъ галаз сих алакъа хуьн, юридический къурулушрихъ галаз икьрарар ку­тIу­нунин кIвалах акьалтIарун, и кIвалах гьар са хуьре гьикI тешкилдатIа, гьа месэ­ладиз­ килигун, махсус график туькIуьрун ге­рек я. Чи райондин мулкарал кIвалах тухудай чIавуз региональный оператордин вилик акъваззавай месэлаяр гьялунин карда чун адаз вири жуьрейрин куьмекар гуз гьазур я. Хуьрерин кьилер, чирвилер гудай идарайрин руководителар, депу­татар арадал къвезвай месэлаяр гьялун патал вири къуватар сад авуналди, кIва­лахиз гьазур я”, — къейдна Фарид Агьмедова.

Совещание кьиле тухудай чIавуз хуьрерин кьилерихъ галаз  ачух раху­нар кьиле фена. РД-дин Гьукуматдин вице-премьер Абдулмуслим Абдулмуслимова яша­йишда арадал къвезвай кIеви аму­­кьаяр кIва­тIу­нин, махсусдаказ чара авунвай чкай­риз акъудунин ва абур тухунай гьакъи гунин бара­дай хуьрерин кьилерал гьихьтин четинвилер ацалтзаватIа, гьа месэладиз итиж авуна. Совещанидал Гъепцегьрин, Советский, Чах­чар-Къазмаяр хуьрерин кьилер рахана, абуру яшайишда арадал къвезвай кIе­ви аму­кьаяр тайинарнавай махсус чкайриз акъудунай гьакъи гунин месэлаяр хкажна, юридический къурулушрихъ галаз икьрарар­ кутIунунин месэладал кIукI гъунин, яшайишдин жигьетдай ийизвай­ къуллугърин гьакъи гунин патахъай поч­тадай вахтунда хабардар авунин важиблувал къейдна. Гарагърин­ хуьруьн кьили До­къузпара районда Мегьарамдхуьруьн райондин сергьятдин патарив, кьилди къачур­тIа, Гарагърин хуьруьн патав арадал атанвай зирзибилдин  хъуртаз­ талукь месэла кудна. Месэла квекай ибарат я лагьайтIа, гар акъатай чIавуз зирзибил Гарагърин хуьруьн мулкар тирвал чкIиз­ва, цIай кьуна кузвай хъурталай хкаж жезвай гумади хуьруьн агьалияр инжиклу ийизва.

Совещанидал “Экологи-Ка” ООО-дин директор  Къазибеговни рахана. Ада чпи  яшайишда арадал къвезвай амукьайриз талукь месэладай районда идалай вилик рейдар тухвайди,талукь тир кIвалах давамарзавайди къейдна.

Дагъустандин Гьукуматдин Председателдин заместитель А.Абдулмуслимова  совещанидал гъанвай месэладин важиблувал, и рекьяй  агьалийрихъ галаз гъавурдик кутунин кIвалах тухунин чарасузвал къейдна.

“Чна Дагъустанда  михьивилер авунин къайдадал амал авун важиблу я. И кардиз­, гьелбетда, вирида итиж авун лазим я”, — малумарна А.Абдулмуслимова.

А.Абдулмуслимован иштираквал аваз гьа ихьтин совещание Ахцегь райондани кьиле фена.

И месэладай кьиле тухвай мярекатрикай “Лезги газетдин” сайтдай гегьеншдаказ кIелиз жеда.

«Лезги газет»


Всего просмотров: 67

Читайте также: