Чир хьун хъсан я!

—        Нервийрин къурулуш  къайдадикай хкатнавайла, агъадихъ галай рецептдикай менфят къачуда: 100 г цилер акъуднавай хумравар як регьведай машиндай авадарна, адак 50 г вирт, 4-5 михьна куьлуь авунвай кIерецдин хехвер какадарна, вакьер-кьаларикай гьазурнавай чайдихъ галаз неда.

И къаришмадик нервийрин къурулуш зайиф хьунин вилик пад кьадай магний гзаф ква.

—        Нервияр къайдадикай хкатнавайла, хуьрекдин са тIуруна авай куьлуь авунвай салатдин таза пеше­рал са стакан ргазвай яд илична­, 20 декьикьада тада. Къайила ам куьзна, са гьафтеда йикъа пуд сеферда 1/2 стаканда авайди иш­ле­миш­­да. И гьалима йифиз ахвар те­къвезвай­лани 1/3 стаканда авайди ксудалди вилик ишлемишун хийирлу я.

—        Ратарин кIвалах хъсанарун патал 200-300 г чIулав хутар чими це хъуьтуьларна, куьлуь авуна, виликамаз це тунвай хуьрекдин кьве тI­уруна авай геркулесдин, гьакьван  сгущенный нек, са лимондин  миже кутада. И къаришма са вацра иш­лемишайтIа, ада сагъламвилиз екез хийир гуда.

—        Инсандин хуквада ягълуйрин къатар ва беден зегьерламишдай жуьреба-жуьре амукьаяр жеда. Абурукай азад хьун патал гьар экуьнахъ ичIи рикIелай са стаканда авай кудай яд хъун меслят къалурзава. Гьар йикъан ихьтин процедуради кефияр хъсанарда, гуьгьуьл ачухарда­.

—        Сезонрин арада (февралдиз-мартдиз) гзаф инсанрин давление хкаж жеда. И вахтунда михьи гьа­­вадал къекъуьн ва яргъалди ксун хийир­лу я. Юкъуз уькIуь са помидор­ ва я са афни тIуьн меслят къалурзава.

—        Атеросклероз азардин вилик пад кьун патал салатдин пешерин, газаррин ва  чугъундуррин мижеяр (вири сад хьтин паяр) сад-садак какадарна, йикъа са сеферда   1/4 стаканда авайди ишлемишда. Ихьтин гьалимади ивидин  дамарар хъсандиз михьда.

—        Кьиле ван авайла, экуьнахъ ичIи рикIелай хуьрекдин 2 тIуруна авай гьажибугъдайрин чIем са ста­кан­да авай минеральный чими цихъ галаз хъвада. Сифте кьилерай са тIи­мил сивихъ къведайди хьиз же­да, ахпа ихьтин гьал алатда. Сагъа­рунин вахт са варз я. Вири пуд курс лазим я.

—        КIвачер тIазвайла, анривай чими авунвай гьажибугъдайрин чIем гуьцI­на, дасмал кудай це кьежирна, кIвачерал алчукна, 5-10 декьикьада къаткида.

—        Уьмуьр яргъи хьун патал, са стаканда авай куьлуь авунвай кIе­рец­дин хвехвер, регъвенвай са кьил серг, хуьрекдин 2-3 тIуруна авай на­бататдин чIем, са лимондин миже­, вири сад-садак какадарна, 2-3 сятда тада. Ахпа ам фал эляна неда.

Мадни, хуьрекдин кьуд тIуруна авай кьурурнавай вергерал, 0,5 л эрекь илична, 10 юкъуз тада. Ахпа ам куьзна, фу нез 30 декьикьа амай­ла­, чайдин са тIуруна авайди ишлемишда. Сагъарунин вахт – нас­тойка куь­тягь­ жедалди. Ихьтин дарманди дамарар михьи ва беден къуватлу ийида.

Вергерихъ  иви икьи ийида лишан ава. Ам давленидин ва трамбофлебитдин азар авайбуру ишлемишна виже къведач.

Гьазурайди – Надият Велиева


Всего просмотров: 48

Читайте также: