Чи дердияр

Саламалейкум, чи милли газетдин къуллугъчияр!

Зун чи багъри газет вахчузвай ватандашрикай я. Халкьдин яшайишдикай, месэ­лайрикай, дердерикай кхьизвай куь макъа­лаяр зазни пара хуш я. Са кьадар вахт тир квез са чар кхьида лугьуз. Идан сад лагьай себебни Лезгинцевриз гуьмбет эцигуниз талукь макъалаяр я. Гьар сеферда газетди и месэла къарагъарайла, зун пара пери­шан жезва. Заз чиз, квезни четин я адакай кхьиз. Махачкъаладиз автобусда аваз фидай гьар сеферда скульптордин гьаятдавай памятник виле акьазва, жуваз регъуь жез­ва. Вучиз­ ам гилани вичин чкадал алач?! Халкьдин арадай са жумарт хва жа­гъанач хьи, жагъанач, скульптордив 3 миллион манат вахкан­а, миллетдин тIвар алай гуьмбет Махачкъалада эцигдайвал ва ам шегьерэгьлийриз аквадайвал. Мегер чун гьакьван зайиф яни?!

Чара амачиз, гила куьмек гунин гьакъин­дай Васильеваз кхьизва. Чидач, гьа куьмек­ агакьдани, агакьдачни. Мумкин я идалай къулухъ памятник эцигиз тахьунни. Чи багъ­ри газетдин 1-чинин вини кьиле кхьенва: “Жуван Ватан, ватанэгьлияр, дидед чIал хуьх!” Пара хъсан, гьар са лезгиди амална кIан­завай гафар я. Амма…

Халкьар ава, чпин чIехида лагьай гафунихъ яб акалдай, гьада къалурай рекьяй­ фидай. Чибур и жигьетдай кьулухъ галама­. Разивал тахьайла, халкьдин крарни вилик физвач. ИкI тирди чаз къенин гьакъикъатдай аквазва. Алатай вири йисара Кьиблепатан Дагъустандиз виликди фидай мумкинвал ганач — бюджетдай бес кьадарда пу­лар ахъайнач, цIийи карханаяр эцигнач. Авайбур барбатI жедай чкадал гъана.

Чи къайгъусузвал, фагьумсузвал себеб яз, мадни татугай крар жезва. Дидед чIал рикIелай ракъурзава. Веледриз лезгийриз, дагъвийриз хас тIварар гузвач. Дидед чIалал ктаб, газет кIел хъийизмач… РикI тIардай месэлаяр, дердияр мадни ава. Кьилди-кьилди абур гьялун, са рахунни алач, четин акъваззава. Гьавиляй чаз, халкьдин къажгъан муркIадални ргада лу­гьудайвал, сад хьана, дердияр виридан куь­мек галаз, сад-садаз панагь, даях хьана, гьялун хъсан я. Лезгинцевриз гьазурна­вай памятникни вичиз чара авунвай ва туь­кIуьрнавай чкадал хкаждайвал.

Р. Мурадов, Каспийск шегьер


Всего просмотров: 80

Читайте также: