Чемпионатдин нетижаяр кьуна

Алатай гьафтеда Махачкъалада, “Дагъустан” РИА-дин конференц-залда,  кьиле фейи пресс-конференциядал РД-дин зегьметдин ва яшайишдин рекьяй вилик финин министерстводин жегьилар кIвалахдалди таъминарунин рекьяй­ “Агалкьун”  центрадин директор Шамил Мегьамедова и мукьвара республи­ка­дин са шумуд майдандал, гьа гьисабдай яз Каспийскда, Хасавюртда, Къизлярда, Буйнакскда, рабочий пешейрай тухвай “Ворлдскилсдин (WorldSkills) жегьил пешекарар” IV чемпионатдин региональный паюнин нетижаяр кьуна. Гъалиб хьайибуру зональный акъажунра, гуьгъуьнлайни Казань шегьерда кьиле фидай РФ-дин чемпионатда иштиракда.

Ш.Мегьамедован гафарай мадни ма­лум хьайивал, алай йисуз чемпио­нат­да устадвал къалурун патал пешейрин (компетенцийрин) кьадар шазандалай 15-дан артух (вири 42) хьана. Яшар 50-далай виниз тир ксаризни чпин алакьунар къалурдай мумкинвал авай. ИкI, алай йисуз жуьреба-жуьре номинацийра иштиракайбурун кьадар 200-далай виниз алатнавай. ЦIинин чемпионатда аслу тушир экспертрин кьадар хкаж, абурун гьазурлухвилин дережани артух хьанвай. Чемпионатдин тешкилатчияр Да­­гъустан Республикадин Гьукуматдин куьмекни галаз РД-дин зегьметдин ва яшайишдин рекьяй­ вилик тухудай ва о­б­ра­зованидинни илимдин министерствояр тир.

Пресс-конференциядал “Жегьил пешекарар” республикадин чемпионат кьиле тухудалди вилик РД-дин Гьукуматдин Председатель Артём Здунован регьбервилик кваз хьайи совещанидикайни ихти­лат кватна. Ада чемпионатдин тешкиллувилиз талукь яз са шумуд месэладин жигьетдай ви­чин фикирар раижна. Кьилди къачур­тIа, гьар са минис­терстводихъ профил­диз­ талукь пешеяр галкIу­рунин теклиф га­на.

Ш.Мегьамедова къейд авурвал, совещанидилай гуьгъуьниз чемпионат тешкилунин кIвалахда активвал арадал атана­.

— Чаз РД-дин культурадин министерстводи куьмекар гуз им сад лагьай йис туш. ЦIи Дагъустандин физический культурадин ва спортдин, гьакIни  транспортдин министерствойрини активвал къалурна. Кьилди къачуртIа, эхиримжида чаз чемпионатдин иштиракчияр санай-масаниз тухуз еке куьмекар гана, — къейдна мугьманди.

Журналистри Шамил Мегьамедовавай чемпионат тешкилунин, кьиле туху­­нин­ карда, гьакI республикада World­Skills гьерекат вилик тухунал гьалтайла ацалтзавай четинвилерикайни хабар кьуна. ИкI, адан гафарай малум хьайивал, эвелни-эвел чемпионатдин иштиракчийриз чпин пешейрай тренировкаяр кьиле тухудай центраяр тахьуни четинвилер арадал гъизва. Кеферпатан Кавказдин федеральный округда санани ихьтин чкаяр авач.

-Чемпионатдин иштиракчияр чпин устадвал ва артуханвал къалурун патал­ маса регионриз финиз мажбур жезва, гьикI хьи чкадал чахъ ихьтин залар, центраяр, тренерар авач. Эгер за тIва­рар кьунвай шартIар чахъ авайтIа, чина неинки региондин кIвенкIвечияр хкядай мярекатар, гьакI къунши регионрайни иш­тиракчийриз эверна, тренировкаяр кьи­ле тухуналди  устадвал мадни хкажиз­ жедай, — къейдна центрадин директорди­.

СМИ-рин векилри Шамил Мегьамедоваз дагъустанвийри виридалайни гзаф гьи пешейрай кIвенкIвечи чкаяр кьазва лагьай суални гана. Адан жаваб­дай, адет яз, чи ватандашар халкьдин ху­дожест­вен­ный сеняткарвилерай ви­кIегь тирди малум хьана. Амма и хилени­ алай аямдин технологияр уьмуьрдиз кечирмишун лазим я. Компьютеррин дизайндай, и рекьяй лап еке конкуренция ав­атIани, да­гъус­танвийри хъсан нетижаяр къалурзава. Гзаф конкурсра чи ва­тандашар СКФО-дин амай регионрилай вилик ква­тIани, Россиядин са жерге регионрин пешекаррилай кьулухъ гала.

Центрадин руководителдин гафарай малум хьайивал, алай вахтунда милли чемпионатда иштиракун патал Дагъустандин хкянавай команда тамамдаказ тайин хьанва.

Къейд авун лазим я хьи, WorldSkills International — коммерциядинди тушир международный гьерекатдин макьсад вири дуьньяда рабочий пешейрин кесерлувал хкажун ва абур вилик тухун я. Милли чемпионатда гъалиб хьайи ксариз пулдин гонорар гузва, кIвалах­далдини таъминарзава — имни адан кьетIен артуханвал я.

Рагнеда Рамалданова


Всего просмотров: 28

Читайте также: