“Чан алай дневник”

ЦIийи ктаб

Мукьвара Дагъустандин ктабрин издательствода “Диалог в контексте времени” тIвар алаз ктаб чапдай акъатна. Адахъ галаз танишардай вахтунда РД-дин милли политикадин ва динрин крарин рекьяй министр Энрик Муслимова ктабдин автор, РД-дин культурадин лайихлу работник, саки 40 йис журналистикадиз бахш авур  Эдуард   Денивич  Эмирован  уьмуьрдин рекьихъ галазни танишарна.  Массовый информациядин такьатра кIвалахун ада  Дагъустандин радиода “Республикадин хабарар”  редакциядин къуллугъчивилелай башламишна.

Къейд авун лазим я хьи, Э.Эмиров республикада аслу тушир СМИ арадал гъунин чешмейрив акъвазнай. 1989-йисуз ада “Чирагъ” тIвар алай, виче XX асирдин 30-йисара репрессийрик акатай республикадин политический ва общественный деятелрин уьмуьрдикай ва кIва­лахдин рекьикай архивдин ван авур ­ма­къалаяр чапзавай культурно-просветительный газетдиз (кьилин редактордин ерида аваз) регьбервал гана.

1991-йисуз Э.Эмиров “Махачкалинские известия” газет арадал гъунин карда иштиракзавайбурун арада авай. Да­гъустандин журналистрикай сифтебурун жергедай яз, ам РД-дин муниципальный тешкилатрин Советдин кIвалах  раиж ийиз эгечIна. “Инсанриз виридалайни мукьва власть” рубрикада чапзавай макъалаяр кар чиз кхьенвайбур ва гьакъикъат къалурзавайбур хьуналди тафаватлу жезвай.

Эдуард Эмирован яратмишунар ада “Новое дело” газетда зегьмет чIугвазвай вахтунда иллаки машгьур хьана. Политикадин отделдин заведующий, гуьгъуьнлайни аслу тушир изданидин кьилин редактор яз, ада “Гражданвилин оборона” рубрика тухвана. Ана лагьайтIа, республикада сифте яз общественный тешкилатрикай, государстводин ва  коммерциядинбур  тушир  тешкилатрин  яшайишдин  рекьяй­ кар алай проектрикай суьгьбетиз хьана. Э.Эмирован ­граж­данвилин позициядин ва пешекарвилин устадвилин ­не­тижада республикада “Набат” РБО, “Первая галерея”,     ДГУ-дин патав гвай юриствилин клиника, СМИ-дин ихтиярар хуьдай центр ва масабур хьтин, лугьурвал, “пуд лагьай сектор­дин” общественный тешкилатрикай гегьеншдаказ чир хьана.

РД-дин Халкьдин Собранидин информациядинни аналитикадин  отделдин кьиле акъвазнавайла, 2004-йисуз парламентдин гъил алаз Э.Д.Эмирова коммерциядинбур тушир тешкилатрин арада “Гьакъикъи крарин программа” тIвар алаз республикадин сад лагьай конкурс кьиле тухун теклифна. Ана са шумуд цIуд НКО-ди иштиракна, конкурсдин 8 гъалибчидиз пулдин премияр ва дипломар гана.

Э.Д.Эмиров Дагъустанда гражданвилин общество арадал атунин месэлайрай республикада кандидатвилин сад лагьай диссертациядин автор я.

Яргъал йисарин гьакъисагъ зегьметдай 2010-йисуз Эдуард Эмироваз Дагъустан Республикадин культурадин ла­йих­лу работник лагьай тIвар гана.

“Автордин патай” паюна Э.Эмирова къейдзавайвал, ктабда активный, цIийивилер арадал гъизвай, чпихъ гражданвилин позиция авай ксарикай суьгьбетзава. Дагъустандин массовый информациядин такьатра журналист яз кIвалахай 30-далай виниз йисара адан интервьюрин, макъа­лайрин игитар гьа ихьтин ксар хьана. Газетриз, журналриз макъалаяр кхьин, радиокомпозицияр арадал гъун патал автордик руьгь кутурбурукай бязибур чи арадай акъатна. Абурун экуь къаматар чи  рикIера гьамишалугъ амукьда. Гьа ихьтин мана-метлеб аваз, ада макъалаяр са ктабда кIватIунин ва ам чапдай акъудунин къарар кьабулна. Автордиз, журналист ва политолог яз, Россиядин общественно-политический уьмуьрдин гьалар Дагъустанда  гьикI дегиш жезватIа, чи ацукьун-къарагъунин  кьетIенвилери абуруз гьикI таъсирзаватIа ахтармишна чирун, вилив хуьн гзаф итижлу тир. Гьаниз килигна адан макъалайринни интервьюрин игитар абурукай рикIивай тир айгьамдалди гзаф вахтара рахазва.

Авторди ктаб архивдин материал, обществознанидин ва тарихдин учебник яз чапдай акъудунин макьсад вилик эцигнавачир, ам алатай девирдин важиблу вакъиаяр эбеди яз рикIел хуьдай “чан алай” дневник я.

Хан Баширов,

РФ-дин искусствойрин лайихлу деятель,

ДГПУ-дин профессор


Всего просмотров: 35
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире