Чалайни аслу я!

Алай вахтунда чна цIийи шартIара уьмуьр тухуз ­чирзава. И шартIарни акьалтIай фендигар коронавирусдин тIугъвалди арадал гъанва. Инсаф течидай, вич гьеле ахтармиш тавунвай ва вилиз таквадай душманди чавай чи мукьвабур, багърияр, чирхчирар къакъудзава. Ихьтин шартIара, зи фикирдалди, карантиндин къайдайрал амал авунихъ, кIваляй къецел экъечI тавунихъ еке метлеб ава. И кар авуналди чна тIугъвалдин винел гъалибвал къачуник чи пайни кутада.

Лагьана кIанда, тIугъвалдихъ галаз женг тухун патал Дагъустандин гьукумдин кьилевайбуру хейлин се­ренжемар кьабулзава. Кьилди къачуртIа, республикадин азарханайра койкайрин кьадар артухарзава. Къенин юкъуз абурун кьадар 8 агъзурдав агакьарнава. Медицинадин 69 идаради коронавирус акатнавай азарлубур кьабулзава, сагъар хъийизва.

КьетIендиз духтуррин зегьмет къейд авуна кIанда. Абур и четин макъамда, чпин уьмуьрни хаталувилик кутуна, азарлубурухъ гелкъвезва. Гзафбурувай чпин хизанрин, багърийрин патав хъфиз жезвач. Югъди-йифди тIугъвалдихъ галаз женгина ава.

Дагъустанди коронавирусдикай хуьдай махсус тадаракар (маскаяр, бегьлеяр, махсус парталар, ИВЛ-дин аппаратар ва мсб.) маса къачузва. И четин девирда­ гьукумди, жемиятди, бизнесди сад хьана кIвалах­зава, игьтияж авайбуруз куьмекдин гъил яргъи ийизва. Са гафуналди, сад жезва. И карди бегьерни тагана тадач.

За мад сеферда чи ватанэгьлийриз республикада­ тайинарнавай къайдайрал амал авуниз эвер гузва. Чи сагъламвал чалайни аслу тирди рикIелай алудмир!

Юнус  Балабегов,

РД-дин Халкьдин Собранидин Председателдин меслятчи,

РД-дин Общественный палатадин АПК-дин,

хуьруьн мулкар вилик тухунин, экологиядин, тIебиат

хуьнин месэлайрин рекьяй комиссиядин председатель


Всего просмотров: 42
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире