“Булах” кlватlал­дин камар

Алатай гьяд юкъуз Кьасумхуьруьн патав гвай ял ядай “Там-Там” центрада са залда литературадин “Булах” кlватlал­дин нубатдин мярекат кьиле фена.

Ана иштиракиз Кьурагь, Хив, Мегьерамдхуьруьн, Къаякент, Су­лейман -Стальский районрай, Дербентдай, Белиждай, ва Махачкъаладай шаирар, писателар хтанвай. Абурун арада Нариман Ибрагьимов, Максим Алимов, Шагьабудин Шабатов, Абидин Камилов, Сардар Абил, Гъулангерек Ибрагьимова,Нажмудин Шихнабиев, Агьмедпаша Агьмедпашаев, Къадимбег Ильясов, Сейфудин Шагьпазов, Гьажи­ Ильясов, и цlарарин автор, Марьям Алискерова, Омар Къазиханов, Бакудай хтанвай манидар Надия Микаил, “Мавел” издательстводин директор Мегьа­мед­ Магьмудов ва масабур авай.

Мугьманар “Булах” кlва­тlал­дин регьбер Гуьзеля Гьасано­вади, кlватIалдин тешкилатрикай сад тир Нариман Ибрагьимова, Голландиядай хтанвай ша­ир-дишегьли Гуьлжагьан Мис­ри­хановади, КТВ телеканалдин корреспондент  Мизамудин Магьмудова  шад гьалара  кьабулна.

–  2016 йисан гатуз арадал атай и кlватlалдихъ вичин гъве­чlи хьтин агалкьунар хьанва – лу­гьузва Г.Гьасановади. – За а вахтунда Интернетда (лезгинетда) жуван дидед чlалал кхьизвайбурун са кlватlал арадал ­гъана. Абур, яшариз килиг та­вуна, ина таниш хьана.  Садбур уьмуьр­дин уькlуь-цуру акунвайбур, муькуьбур лагьайтlа, шииратдин рекье кичlез-регъуьз сифте камар къачузвайбур. Сад  садавай мензилриз гзаф яргъа ава­тlани, чна алакъаяр мадни ге­гьеншарна, “Булах” кlватlал арадал гъана.

И са куьруь вахтунда чна са шумуд ктаб чапдай акъудна: 15 шаирдин “Булахдин чешмедал” уртах ктаб, М.Алискеровадин “Вун хьаначиртlа”, Г.Гьасано­вадин, “Мулдин цуьквер”, “Гьиссерин алемда” Г. Мисрихановадин “Пуд стlал”, В.Батманован “Лекь”.

Гележегда кьилдин авторрин ктабар, альманах акъуддай ва жаванринни жегьилрин са уртах ктаб чапдай фикирар ава.

Месэлаярни авачиз туш. Абур ктабар акъуддай пулунин та­кьатар жагъурунихъ галаз ала­­къалу я. Чна спонсорриз и ва­­жиблу кlвалахдик кьил кутун патал эвер гузва.

Винидихъ тlварар кьур вири иштиракчийри “Булахдин” кlва­лахдиз хъсан къимет гана, халкьдин четин месэлайрал акъвазна, чlал хуьдай ва ам ви­лик тухудай рекьер веревирдна, кlватl хьанвайбуруз чпин шиирар кlелна.

Мярекатда иштиракай Надия Микаила, Дильмира Ашурбеговади  ва Омар Къазиханова тамамарай манийри иштиракчийрин гуьгьуьлар генани цицlи авуна.

“Булахдин” мярекатдилай гуьгъуьниз и тешкилатдин иштиракчи, шаир  Гуьлжагьан Мисрихановадин 60 йисан юбилей шад гьалара къейдна.

Мярекат КТВ телеканалди лентиниз къачуна.

Къагьриман Ибрагьимов


Всего просмотров: 117

Читайте также: