Мегьамед Ибрагьимов

Белижвийрин мурад

Кьилин редактордин гаф

Эхиримжи йисара Да­гъус­тандин здравоохраненидин уьмуьрда хъсан патахъ дегишвилер кьиле физва лагьай­тIа, зун гъалатI жедач. Март­дин эвел кьилера Махачкъалада хьайи са мярекатдал РД-дин здравоохраненидин министр Жамалудин Гьажиибрагьимова абурукай гегьеншдиз ихтилатна. Виридал акъваздач, анжах са шумуд агалкьун къейдда. Дагъустандин духтурри 2019-йисуз республикада икьван чIа­валди менфят къачун тавур жуьрейрин куьмек­далди операцияр кьиле тухванва, 224,9 миллион манатдихъ компьютердин томографиядин 5 аппарат, 256,3 миллион манатдихъ тади куьмекдин 108 машин, 354,1 миллион манатдихъ 55 флюорограф маса къачунва, духтурханаяр 395,7 миллион манатдин къиметда авай цIийи тадаракралди таъминарнава. И сиягь мадни давамариз жеда.

Гьа са вахтунда республикадин медицинадин хиле гьеле гьялиз тахьанвай месэлаяр, кимивилер, нукьсанарни пара ава: азарлуйривай ришветар къачун, государстводи гьавая ахъайзавай раб-дарман набутрал агакь тавун, духтурханаяр меди­цинадин тадаракралди, пешекарралди бес кьадарда таъмин тахьун, варцаралди нубатра акъвазун ва икI мад. Лагьана кIанда, республикадин кьиле авайбуру и месэлаяр гьялун патал серенжемар кьабулзава, пулдин такьатар чара ийизва. Гьелбетда, вири крар садлагьана санлай гьялиз жедач. Амма бязи месэлаяр гьялиз тежез (ва я гьял тийиз) йисаралди амукьун тажуб жедай кар я. Ихтилат Дербент райондин Белиж поселокда 10 йисалайни виниз девирда эцигна акьалтIариз тежезвай духтурханадикай физва.

И месэладин патахъай алай йисан эвел кьиле­ра поселокдин агьалийри республикадин руководстводизни хабар гана. Чпин арзада абуру са шумуд­ йис идалай вилик эцигда лагьана гъиле кьур да­ра­мат акьалтIа­ру­нин, аялрин инфекцийрин духтурханадин да­ра­мат цIийикIа туькIуьр хъувунин кIва­ла­хар кьиле тухунин карда куьмек тIа­лаб­на­вай.

Белижда цIийи духтурхана хьунихъ рикI кузвай са касди чи редакциядивайни и кардай кьил акъудун тIалабнавай. За сифте нубатда здравоохраненидин министерстводиз чар рекье туна. Жаваб тамам са вацра вилив хвена. Гьайиф хьи, республикадин бязи министерствойривай, ведомст­войривай къени газетрин редакцийрай къвезвай суал­риз, энгел тавуна, вахтунда жавабар гуз жезвач. Шукур Аллагьдиз, гена са вацралай кьван­ни агакьна. Чарче ихтилат физвай объектдин заказчик-застройщик РД-дин эцигунрин ва ЖКХ-дин ­министерство я лагьана къейднавай ва и месэ­ладин патахъай гьа министерстводиз кхьин меслят къалурнавай. Эцигунрин ва ЖКХ-дин минис­тер­стводини, вацралайни пара вахт алатайла, са шумудра­ зенгер авурдалай кьулухъ жаваб га­на. Ана кхьенва­:

РД-дин эцигунрин ва ЖКХ-дин министерстводи, Дербент райондин Белиж поселокда 50 койкадин участковый духтурханадин дарамат эцигунин кIвалахар пулдин такьатар тахьунихъ галаз алакъалу яз акъвазарайдакай хабар гузва.

Республикада 2020-йис патал кьабулнавай инвестицийрин программадин сергьятра аваз тIвар кьунвай духтурхана эцигун фикирдиз къачунва. Объектдин проектдинни сметадин документациядик дегишвилер кухтадайвал я. Абурни цIийи истемишунрихъ галаз алакъалу я. И макьсаддиз 10 миллион манатдин кьадарда аваз пулдин такьатар чара ийида.

Санлай къачурла, духтурхана эцигунин кIвалахриз 210 миллион манат пул ахъайда. 50 млн. — 2021, 150 млн. — 2022-йисара.

Объект эцигунин кIвалахрив 2021-йисуз эгечIдайвал я”.

Лезгийрихъ рекьимир, цIегь, гатфар къве­да­ лугьудай мисал ава. 10-йисалай виниз цIийи духтурханадал вил алаз акъвазай жемятди мад кьве йисуз дурум хгана кIанзава. Вучда кьван, маса ча­ра авач. Белки, 2022-йисуз кьванни белижвийрин мурад кьилиз акъатин. ИншаАллагь!

Мегьамед  Ибрагьимов


Всего просмотров: 124
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире