Бажарагъдиз часпарар чидач

Чи ватанэгьлияр — гьар сана

Халкьдин арада фадлай машгьур “Сару билбил” манидин чIалар шаир Лезги Няметанбур тирди гзафбуруз чида, амма адан чIалариз сифте яз 1991-йисуз макьам кхьейди 17 йисан яш­да авай жегьил композитор  Адалат  Гьажиевич  Искендеров  я. Агалкьунралди сифте кам къачур акьалтзавай бажарагълу композиторди музыкадин рехъ гележегдани давамарна. 

Вичел Адалат Къурушви тахаллус акьалтнавай ватанэгьли алай вахтунда Ярославль ше­гьер­­да яшамиш жезва. Ам ком­по­­зи­торни, кьавални, милли мя­ре­катра кIвенкIвечивилелди иш­ти­рак­завай ватанпересни, юрист­ни я.

Адалат Искендеров 1974-йисан 22-январдиз Баку шегьерда  ди­­дедиз хьана. Адан ата-бубайрин ватан Докъузпара райондин Къурушрин хуьр я. 1991-йисуз мектеб ва гуьгъуьнлай Махач­къа­лада промышленностдин колледж, ДГПУ-дин тарихдинни праводин фа­культет тафаватлудаказ куьтягьна.

Музыкадиз ада аял чIавалай майилвалзавай. Гьеле ругуд йисан яшда аваз адавай чIагъан ягъиз жезвай. Райондин, шегьердин, республикадин медениятдин мярекатра ада активдаказ иштиракзавай.

А.Искендеров са шумуд терефдихъай алакьунар авай инсан я. Халкьдин арада машгьур хьайи гзаф кьадарда манийриз ада авазар кхьенва. Кьилди къа­чуртIа, “Зи чубарук”, “Елена”, “Ма­рал”, “Куьч та­хьай дурна”, “КIа­ниди”, “Зи Къуруш” ва са жерге маса манияр Ада­латан бажарагъ себеб яз пайда хьана. Композиторвилин жигьетдай адахъ гьеле халкьдив агакь та­вунвай яратмишунарни гзаф ава.

Алай йисан январдин вацра, Адалат Къурушвидин 45 йисан юби­лейдихъ галаз алакъалу яз, композитордин яратмишунриз талукь яз Дербент шегьерда кьиле фейи межлис-концертни ри­кIел аламукьдайди хьана. Ком­позитор­ди туькIуьрай авазрин манияр тамамаруналди, концертда са жерге лезги манидарри, муздестейри иштиракна.

2004-2019-йисара ам хизандихъ галаз Санкт-Петербургда яшамиш хьана. Ина ам эцигунрин хиле карчивилел машгъул жез­вай. Уьлкведин кеферпатан меркезда ада алвердал маш­гъул­ тир вичин “ОПТТОРГ24” тешкилат (ООО) арадал гъана.

Санкт-Петербургда лезгийри кьиле тухвай гзаф мярекатра ада кIвенкIвечивилелди иштиракзавай. Алай йисан сентябрдиз ам Ярославль шегьердиз куьч хьана. Инани ада лезгийрин мярекатрик вичин пай кутаз алахъзава. Мукьвара кьиле фейи вири дуьньядин лезгийрин умуми диктантдин серенжемдани ада Ярославлда авай чи вилик-кьилик квай са жерге ватанэгьлийрихъ галаз иштиракна. Адалат Къурушвиди диктант кIелунин ва кхьей кIвалахар ахтармишунин везифаяр вичин хивез къачуна.

Жемиятдин крара иштиракунилай гъейри, кьилин образование ва хъсан чирвилер авай пешекарди Ярославлда консалтинговый  “Бизнес-Маркет” тешкилат арадал гъана ва кьилдин агьалийризни  тешкилатриз юридический рекьяй къуллугъзава.

Адалат Искендерован хизанда кьуд веледдиз тербия гузва.

— Мукьвара кьиле тухвай диктантдихъ чIал хуьнин, гъурбатда яшамиш жезвай жегьил несилдиз хайи чIал кIанарунин жигьетдай еке метлеб авай. Мукьвал-мукьвал тухвана кIанза­вай­ди я чна ихьтин серенжемар. Ата-бубайрилай атанвай ирс жегьилрал агакьарун чи везифа я, — лугьузва Адалат Гьажиевича.

Къуй адахъ гьар са карда агалкьунар хьурай!

К.Ферзалиев


Всего просмотров: 259

Читайте также: