Бажарагъ авай актриса ва манидар

“Манидал рикI алай инсан кьуьзуь жедач”, — лугьузва халкьдин мисалда. Зи фикирдалди, и гафар бажарагълу актриса ва манидар  Эльмира  Къараханова  хьтин инсанриз лагьанвайбур я. Эльмирадин къанажагълу вири уьмуьр манидихъни ширин нагъмайрихъ галаз алакъалу я. Гьеле мектебда кIелзамаз ада районда кьиле тухузвай манийрин суваррик, килигунра, конкурсра иштиракиз, кIвенкIвечи чкаяр кьаз хьана. Же­гьил­ рушан манийри яб акалзавабурук гьевес кутадай, гьикI хьи, Эльмиради ма­ни-макьам вири бедендалди гьиссзавай. Искусстводиз авай кIанивили жегьил руш  чIехи агалкьунрихъни тухвана­. Къе ада, хъсан тежриба авай манидар ва бажарагълу актриса яз, медениятдал, театрдал рикI алайбур шадарзава.

— РикIел алама, зи хайи хуьруьз — Кье­пIир-Къазмайрал хъсан тамашаяр гваз мукьвал-мукьвал Лезги театрдин коллектив мугьман жедай. Им зун патал еке сувар тир. Заз фикиррай жувни абурун жергеда аваз аквадай, — лугьуз­ва Эльмира Назимовнади.

Рушан мурад кьилиз акъатна. Алай вахтунда ам  чи милли театрдин  хъсан артисткайрикай сад я. Вичин ширин, назик се­синалди манияр ягъиз, тамашачияр шад ийиз, гьа са вахтунда Эльми­ра театрдин репертуардик квай саки вири тамашайрани къугъвазва.

Бажарагълу актрисади вичи  сегьнеда  тамамарна кIанзавай гьар са ролдал, гьар са къаматдал гзаф зегьмет чIуг­вазва, гьавиляй абур рикIел аламукьдайбур, тамашачийрин руьгьдин игьтияжриз жаваб гузвайбур жезва.

— 1992-йис. КьепIир-Къазмайрал тамаша гваз чи театрдин коллектив нубатдин сеферда атанвай. Тамаша куьтягь хьайила, заз цуьквер гваз сегьнедал атанвай рушарикай хъсан буй-бу­хах авай, иер акунар, чинал хъвер алай Эльмира акуна. Гьа сифте акунмазди, заз ам кьетIен бажарагъ авай, хъсан руш тирди чир хьана. За адаз гуь­гъуьн­лай театрдиз атун теклифна, — суьгьбетзава Дагьустандин халкьдин артист Мамед Мамедова.

Гьа икI Эльмирадин мурад кьилиз акъатайдалай инихъ 25 йис алатнава. Лезги театрда ада 70-далай гзаф къаматар яратмишнава. Абурун чIехи пай кьилин ролар я. Сифтегьанбурун жергеда Анжеладин (А.Исмаилов, «КIвал хъитIкьинна»), Малаикдин (Э.Наврузбегов, «Ярагъ Мегьа­мед»), Лаурадин (А.С. Пушкин, «Къванцин мугьман»), Зейнабан (Х.Авшалумов, «Имам Шамил») ва гзаф маса ролар ава.

— Эхиримжи йисара Эльмиради гьевесдивди кIвалахзава. Гьавиляй адаз классикадай са шумуд ролда къугъва­дай­ мумкинвални хьана, — лугьуз, актри­садин алакьунрал шадвалзава театр­дин кьилин режиссёр, Дагъустандин халкь­дин артист Мирзебег Мирзебе­гова.

И жигьетдай яз алай вахтунда Э.Къа­­раханова классикадин репертуардай Х.Тагьиран ва Къ.Межидован «Ашукь Саид» драмада Дилберан, И.Гьуь­сей­нован «Етим Эмин» трагедияда Туькезбанан ролра къугъвазва. Ибурулай гъейри, Эльмиради вичин бажарагъ гьар жуь­редин тамашайра къалурзава. Мисал яз, А.Исмаилован «Пуд югъ» (Марал), Б.Тураян «Вун я зи ди­де» (Диляра), С.Саидгьасанован «Дагъус­тандай тир Гомер» (хуьруьн дишегьли), Ф.Беделован «Аюхар»(Къизилбике) ва масабурун тIварар кьаз жеда.

Эльмира Къараханова хъсан дидени я. ГъвечIи Айгуьна адан рикI шадарза­ва.  КIвалин-къан, аялдин вири къайгъу­ярни адан хиве ава. Чи мурад Эль­ми­­ра­дихъ мадни еке агалкьунар хьун, рикIе авай вири мурадар кьилиз акъатун я.

Эминат Заирбегова


Всего просмотров: 59

Читайте также: