Азарлуйриз къулайвал патал

И ва я маса азаррикай сагъарун ва ре­абилитация кьиле тухун патал Да­гъустандин агьалийриз къулай жедайвал гила  ихьтин серенжемрикай (виликдай региондилай къецез фин лазим жезвай) чкадал менфят къачудай мумкинвал хьанва. Ихьтин шар­тIар Республикадин клинический больницада (РКБ, центральный больница) тешкилнава. Идакай РД-дин здравоохраненидин министерстводин сайтда хабар ганва.

Авайвал лагьайтIа, РКБ-да медицинадин куьмекдин реабилитациядин рекьяй 2-нумрадин отделение 2008-йисалай инихъ кардик квай. Ана азарлуяр дар­манар галачир къайдаяр ишлемишуналди кIвачел ахкьалдарзавай. Кьилди къачуртIа, ина неврологиядин, яни ЦНС-дихъ (центральный нервный система) галаз алакъалу азарар  (меф­тIедин ивидин циркуляция чIур хьун, остеохондроз­, полинейропатия ва масабур) лазердин нурарикай менфят къачуналди сагъарзавай. Физиотерапиядин кабинетни кардик квай.

Амма тамамдаказ и отделение анжах гила кардик акатнава. Къенин юкъуз­ ина неинки физиотерапиядин, ла­зердин нурарин, гьакIни гирудотерапиядин (зилияр ишлемишун), магнитотерапиядин, кьулан тар ялна акъажунин, пневмомассаждин ва массаждин кабинетар кардик акатнава. Отделенидин хейлин пешекарар лап четин гьалда авай азарлуйрин къулайвал патал 1-неврологиядин ва  реанимациядин отделенийрани абурун къуллугъда акъвазнава. Идалайни гъейри, ина нейрохирургиядин отделенида операцияр кьиле тухванвай, гьакIни кьулан тарцин дискрин протрузийри тади гузвай, невралгия, нейропатия, дамарра ивидин гьерекат йигин хьунин, варикоз (да­марар экъис хьун), мастопатия, си­вин тахьун (гьам дишегьлийриз, гьамни итимриз талукь яз), простатит, пиелонефрит, цистит, астма, бронхит, отит, ринит, артрит, артроз ва гзаф маса азарар авай ксарин сагъламвал мягькемардай серенжемар кьабулзава.

— Дагъустандин агьалийриз ина залан азар тир инсультдилай кьулухъ реабилитация кьиле тухудай мумкинвални ава, — къейдзава духтур-невролог, те­рапевт,  физиотерапевт Али Абузиядова. — Ина суставда имплант эцигнавай (эндопротезирование) азарлуйризни куьмекар гузва. Эгер икьван гагьди чи азарлуяр реабилитация кьиле тухун патал республикадилай къецез фин герек къвезвайтIа, гила ихьтин лазимвал амач. Пешекарар азарлуйрин сагъламвал мягькемарунин къаравулда акъвазнава. Хъсан нетижаярни ава.

А.Абузиядован гафарай мадни чир хьайивал, мукьвал вахтара отделенида сагъламардай физкультурадин кабинетни кардик акатда. Планрик цIийи жуьредин къайдайралди сагъарун патал аппаратар маса къачунни ква.

Регина СЕМЕДОВА


Всего просмотров: 22

Читайте также: