Арендатор Тагьирмирзе

Зегьметди инсандал баркалла гъида, лугьузва бубайрин мисалда. Чилел кIвалахзавай, суьрсет гьасилзавай, гьа идалди халкьдин суфра берекатлу ийизвай инсанар чи хуьрера гзаф ава. Абурукай яз, завай Курхуьрелай тир чилин, зегьметдин къадир авай инсан, эхиримжи йисара арендатор яз кIвалах­завай  Тагьирмирзе  Таибован  (шикилда) тIвар гьуьрметдивди кьаз жеда. Тагьирмирзе хьтин инсанар акурла ятIа, Максим Горькийди “Заз зи вири уьмуьрда кIвалахиз кIандай ва чпелай кIвалах алакьдай инсанар халис игитар яз аквада” гафар кхьейди? Шак гъиз жедач, кIва­лахдай касдиз вири девирра гьуьрмет хьайиди я, женни ийида.

Т.Таибов пешекар агроном я. Саки 25 йисуз ада “Самурский” сов­хозда бригадирвиле, кьилин агрономвиле кIвалахна, совхоздин экономика мягькемаруник, хуьруьн майишат вилик тухуник еке пай кутуна.

Совхозар чкIайла, зегьметдал рикI алай инсан яз, Тагьирмирзеди верчерин ферма ачухна, са шумуд йисуз къушчивал вилик тухвана.

2010-йисалай инихъ Т.Таибов арендатор я. Ада 49 йисан муддатда 25 гектар чил кирида къачунва.

— Чи хуьруьн паласада виликдайни техилар гьасилзавайди тир, — лугьузва Тагьирмирзеди. — ЦIинин йисан бегьер патални чи хуьруьнвийри 300 гектарда зулун магьсулар цана, анрай гадни агуднава. Захъни 20 гектар  никIер ава. Анрин гьар са гектардай за 20 центнердилай виниз бегьер кIватI хъувуна.

Тагьирмирзе Таибовахъ 2 гектар хтун ва 1 гектар пIинидин, ичин, маш­­машин къелемар какахьна цанвай багъларни ава. Чаз акурвал, арендаторди вичин участокда ципи­цIар, афнияр, помидорар, чичIекар­ни гьасилзава. Тежрибалу агроном, чилин къадир авай лежбер инсан гелкъвезвай багълар, салар чешнелу гьалда ава. Т.Таибова багъларай ва саларай гьар йисуз тарифдин бегьерар вахчузва.

Зегьмет уьмуьрдин игьтияж яз аквазвай Т.Таибовахъ кIвалахда мадни агалкьунар хьана кIанзава чаз.

Хазран Кьасумов


Всего просмотров: 33

Читайте также: