Арбен Къардашан “Етим Эминакай веревирдер” ктабдикай

И мукьвара, машгьур журналист, писатель ва литературадин критик Гьажи Ильясов редактор яз, “ЦIийи Кавказ” (“Новый Кавказ”) издателрин дестеди Арбен Къардашан “Етим Эминакай веревирдер” ктаб акъуднава. 

Ам кьетIен жуьреда кхьенва. Ана Етим Эминан уьмуьрдиз ва яратмишунриз бахшнавай эссеяр гьатнава. ЧIехи шаирдинни адан мукьва-кьилийрин алакъайрикай, ам девирдин къайдайрив ва гьукумдив эгечI­завайвиликай, адан къелемдикай хкатай ва чеб чи шаирдин яратмишунрин кукIушар яз кьабулнавай кьилди-кьилди чIаларикай ктабдин авторди ийизвай веревирдери кIелзавайбурув халкьдин руьгьдин са пай хьанвай шиирриз цIийидаказ килигдай, абур генани дериндай кьатIудай, Етим Эминакай икьван гагьда малум тушир делилар чир жедай мумкинвал гузва.

ЦIийи ктаб «Мирес, стха, хва» (шаир мус ва гьина ханатIа, гьадакай), “Эмина Ярагъ Мегьамедакай вуч лагьана…”, “Муьгьуьббатдин дерт — гьахъ-дувандин терездал”, “Са шиирда — кьве муьгьуьббат”, “Квахьай тIалаб”, “Девирриз авур веси”, “Эмин ва Къазанфар”, “Эмин ва Мелик”, “Эмин ва Туькезбан”, “Эмин ва гьукум”, “Уьмуьрдихъ метлеб хьунин шаздаяр”, “Эмин ва Сулейман” — санлай 19 кьиликай ибарат я.

“Шаир мус ва гьина ханатIа, гьадакай” кьиле Арбен Къардаша кхьизвайвал, “Им куь мирес Эмина квез лугьузва…” цIарцIяй аквазва хьи, Эмина вич цилингвийрин мирес, яни кьилдин са касдин ваъ, сагъ са хуьруьн мирес я лугьузва,  вичин бубадин патай. Шаир Ялцугъа дидедиз хьана.

“Акьал­тIарун” кьиле гьахълудаказ къейдзавайвал, Етим Эминахъ сирерни гзаф ама. Абурай виридай кьил акъудиз хьун мумкин туш. Вучиз лагьайтIа, чав адан ирс вири тамамдиз агакьнавач, адан са пай, мумкин я, чIехи пай квахьнава. Шаирдин уьмуьрдин уламарни чаз вири тайин хьанвач, абуруз талукь ва чпел шак гъиз тежедай хьтин делилар тIимил ама. Амма чав агакьнавай ирсинини, шаирдин уьмуьрдиз талукь делилрини Етим Эмин зурба инсан ва чIехи шаир хьайиди къалурзава…

Хазран Кьасумов


Всего просмотров: 67

Читайте также: