АПК вилик тухуда

Мукьвара Ахцегьа РД-дин хуьруьн майишатдин ва недай суьрсетдин министерстводин конференция кьиле фена. Мярекатдал министрдин заместитель Эмин Шайхгьасанова республикадин кьиле авайбуру агропромышленностдин хел вилик тухунин жигьетдай кьабулзавай серенжемрикай суьгьбетна.

Ада къейд авурвал, 2019-йисуз республикадин мелиорациядин къурулуш цIийикIа туькIуьр хъувуниз 500 миллион манат серфна. Им гьич садрани тахьай хьтин агалкьун я. Нетижада чилин хейлин  майданар цик акатда, алава бегьер къачудай мумкинвал жеда. Э.Шайхгьасанова районра хуьруьн майишатдин суьрсет гьялдай гъвечIи карханаяр арадал гъидай мумкинвилер авайди ва абурукай менфят къачун герек тирди къейдна.

Гуьгъуьнлай РД-дин хуьруьн майишатдин министерстводин недай-хъвадай затIаринни гьялдай промышленностдин отделдин начальник Агъабала Агъахановни рахана. Ам чкайрал хуьруьн майишатдин суьрсет гьасилзавайбуруз (СПК, КФХ, ЛПХ) гьукуматдин па­тай авай куьмекдин, министерстводи  кардик кутунвай программайра иштиракунин шартIарин ва важиблу бязи маса месэлайрал гегьеншдиз акъвазна­.

Конференциядал гьакI Кьиблепатан Дагъустанда емишарни салан майваяр хуьдай чкаяр ва гьялдай карханаяр арадал гъунин, малдарвилинни хипехъанвилин хел вилик тухунин ва, талукь тирвал, дагъвийриз зегьметдин чкаяр тешкилунин мумкинвилер веревирдна. КьетIен фикир муьштерийриз экологиядин жигьетдай михьи суьрсет маса гунин­ ва жемятдин хатасузвал таъминарун патал электронный сертификациядин «Меркурий» къайдадал амал авунин месэлайриз гана. И кардин патахъай чпин фикирар Докъузпара ва Рутул районрин кьилер тир Агьмед Агьмедова, Ибрагьим­ ­Ибрагьимова, къунши районрин УСХ-рин начальникри ва масабуру лагьана.

Экономика, халкьдин майишат виликди фин и рекьерай гьукуматдин дуьз­гуьн политикадилай гзаф аслу я.Хуьруьн майишатдин производстводиз инвестицияр желб авуни ва и хиле бизнес­диз къулай шартIар яратмишуни къе­непатан ва къецепатан базарра алишверишдин сагълам конкуренция тешкилдай мумкинвал гуда. Ахцегь райондин кьиле авайбур хуьруьн майишат дурумлудаказ виликди тухуз чалишмиш жеда, баянар гана Ахцегь райондин муниципалитетдин  кьил Осман Аб­дулкеримова.

Дашдемир  Шерифалиев


Всего просмотров: 39
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире