Алим ва муаллим руш

И мукьвара Надир Фетягьовичан хи­зандив ва адан мукьва-кьилийрив шад хабар агакьна. Надир Фетягьовичанни адан уьмуьр­дин юлдаш Полина Евгеньевнадин руш  Русанади  Москвадин государстводин лингвистикадин универ­ситетда (виликан Морис Торезан тIва­­ру­нихъ галай Халкьдин институтда) фи­­­лологиядин илимрин доктор, доцент, француз чIалан факультетдин заведующий Кудрявцева Надежда Борисовнадин регь­бервилик кваз агалкьунралди илимдин докторвилин диссертация хвена. Русана Надировнадин илимдин кIва­лахдиз официальный оппонентар тир филологиядин илимрин доктор, доцент Скуратов Игорь Владимировича, филологиядин илимрин кандидат, доцент, роман чIаларин кафедрадин профессор Николаева Ирина Викторовнади ва маса алимри еке къимет гана. 

Русанадин буба Надиран ери-бине Кьурагь райондин Штулрин хуьряй я. Дербент райондин Карл Марксан совхозда лап хъсан къиметар аваз юкьван школа куьтягьай жегьил Москвадиз рекье гьатна. РикIе кIелунин къаст авай дагъви ина Москвадин  химиядин хаммал­дикай чпихъ лап гъвечIивал, назиквал авай техникадиз талукь затIар расунин къайдаяр чирдай институтдик экечIна ва анаг агалкьун­ралди куьтягьна. Кьве йисуз ада Советрин­ Армиядин жергейра къуллугъна. 1980-йисуз ам, вичихъ галаз са курсуна кIе­лай урус руш Чакина Полина Евгеньевнадал эвленмиш хьана. Надир Фетягьовича гзаф йисара Тамбов шегьердин НИИ-да сифтедай ин­женервилин, гуьгъуьнай кар алай инженервилин везифаяр тамамарна. Алай вахтунда Надир Фетягьовича Тамбовский областдин рекьерин гьерекат кардик кутадай центрадин начальникдин заместителвиле, адан уьмуьрдин юлдаш Полина Евгеньевнадини гьа и шегьердин “Яру Октябрь” тIвар алай военный заводда химиядин лабораториядин начальниквиле кIва­лахзава. Вичикай суьгьбет физвай абурун руш Русана Надиров­нади гимишдин медалдалди школа, яру дип­лом къачуналди Москвадин гьуку­мат­дин университет ва агалкьунралди аспирантура куьтягьна. Алай вахтунда Русана Надировнади Москвадин экономикадин кьилин школада француз чIалан тарсар гузва. Адаз гьакI лап хъсандиз немс ва ингилис чIаларни чида. Гьа са вахтунда алим руш илимдин кIвалах­дал­ни машгъул я.

Чна Русанадиз, Надиран вири хи­зан­риз ва абурун мукьва-кьилийриз и еке агалкьун – алимвилин тIвар мубарак ­ийизва.

Къуй Русана Надировнадихъ гележегда мадни еке агалкьунар хьурай!

Мегьамедсалигьан Сабир


Всего просмотров: 35

Читайте также: