Алаваяр кухтун теклифнава

Госдумадиз дидевилин капитал ишлемишуник алаваяр кухтун теклифнава. Абур Владимир Путина гьар йисуз Федеральный Собранидиз рекье твазвай Чарче къалурнавай тапшуругъдалди “Сад тир Россияди” арадал гъанва.

Чна идалай виликни хабар гайивал, гила дидевилин капитал 2020-йисан 1-январдилай сад лагьай аял хайи ва хвавиле, рушвиле кьабулай хизанризни гуда. А пулунин кьадар 466 617 манат я. Кьвед ва гуьгъуьнин аялар хайи ва я хвавиле, рушвиле кьабулай дуьшуьшра гудай пулунин кьадарди 616 617 манат тешкилда. Идалайни гъейри, дидевилин капиталдик кутунвай цIийиви­лерал асаслу яз, и программа 2026-йисан 31-декабрдалди давамарнава, ам гьар йисуз индексация авунни къалурнава.

Мадни дидевилин капитал гунин гьакъиндай къарар арза агакьайдалай  кьулухъ 15 йикъан вахтунда кьабулун лазим я, виликдай хьиз — вацран вахтунда ваъ.

Дагъустандин парламентдин депутат, Халкьдин Собранидин здравоохраненидин ва яшайишдин политикадин рекьяй Комитетдин председатель, “Сад тир Россиядин” региональный политсоветдин Президиумдин член Висампаша Ханалиеван гафаралди, 2019-йисуз Да­гъустан Республикада авай Пенсийрин фондунин территориальный органриз дидевилин капитал гун патал — 15,5 агъзур, федеральный закон кардик акатайдалай кьулухъ вири девирда  294,7 агъзур касди арзаяр гана.

“Яшайишдин рекьяй страхованидин Фондунин делилралди, 2019-йисуз республикада хизанра сад лагьайбур тир 13 агъзурни 595 аял хана. Идахъ галаз алакъалу яз, дидевилин сертификат къачун патал 2020-йисуз 30 агъзурдалай виниз арзаяр атун гуьзлемишзава”, —  хабар гана В.Ханалиева.

«Лезги газет»


Всего просмотров: 90
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире