Акрополь

Квез чидани?

Грециядин меркез Афины шегьер къадим девиррин имаратралди девлетлу ва фикир желбдай чка я. Ажайиб чкайрикай сад 156 метрдин кьакьанда авай раг хьтин тепе я. Адаз Афинрин Акрополь лугьузва. А чкадин яргъивал 300 метрдиз ва фирягьвални 170 метрдиз барабар я.

Малум тирвал, анаг пачагь жедай кьилин чка тир.  Ана ибадатханаярни тIимил авачир. Къенин юкъуз анаг къадим заманадин архитектурадин искусстводин тимталдиз (памятник) элкъвенва. Интернетдин “Википедия” энциклопедияда къалурнавай делилралди, и кIун­­тIал чи девирдал къведалди IV асирда инсанар яша­миш хьаналда. Чи девирдал къведалди V асирда­ ана Парфенон, Пропилеи, Эрехтейон ва Ники Аптерос ибадатхана хьтин зурба дараматар эцигунин месэлайрал гьукумдар Перикла гуьзчивал тухвана. Венециядинни Туьркиядин арада дяве (1684-1699-йисар) кьиле фейи вахтунда, 1687-йисуз, Парфенондиз ва маса дараматриз хейлин хасаратвилер хьана. Кьилди къа­чуртIа, Парфенонда хуьзвай барут хъиткьиннай.

Риваятрал асаслу яз, Афинрин сад лагьай пачагь ва шегьердин бине кутурди тир Кекропсан гьуьр­метдай Акрополдиз бязибуру Кекропия лугьузва.

Тарихда Акрополдин кьилел жуьреба-жуьре мусибатар атана. Грекринни персерин арада (чи девирдал къведалди 480-йисуз) кьиле фейи дяведин вахтунда анин ибадатханаяр чукIурна. А чIавуз чкадин агьалийри пак дараматар анжах Эллададай (къадим Афины) мидяяр чукур хъувурдалай кьулухъ гуьн­гуьна хтунин кьин кьуна.

ХIХ асирдин эхирра Акрополдин къадимвилин акунар са кьадарда арадал хкана.  Акрополдин ибадатханайрин тимталар Британиядин музейда, Париждин Луврдани ава.

«Лезги газет»


Всего просмотров: 35
Подпишитесь на наши каналы:

Читайте также:


Новости партнеров