Ахцегь райондин Хуьруьг хуьре марифатдин «Люминари» макан ачухна

15-майдиз Ахцегь райондин Хуьруьгрин хуьре «Люминари» марифатдин макан шад гьалара ачухунин гегьенш мярекат кьиле фена. И гьакъиндай «Лезги газетдиз» муниципалитетдин администрациядин пресс-къуллугъди хабар гузва.

Мярекатдал мергьяматлувилин «Марифат» фондунин президент Магьмуд Абдулкеримова Кеферпатан Кавказда сифте яз пайда хьанвай, бажарагълу аялар патал эцигнавай «Люминари» центр ачухнавайдакай малумарна.

Илимдин чирвилер къачуниз майилвалзавай бажарагълу, къуватлу аялар патал ихьтин макан ачухунин мурад 85 йисан яшда авай РД-дин лайихлу муаллим Магьмуд Абдулкеримовахъ гьеле 70-йисарилай авай. А чlавуз мектебдин директорвал авур муаллимдин ниятди алай вахтунда цуьк акъудна. Къад лагьай асирдин сифте кьилера информациядин технологияр вилик финикди Магьмуд муаллимди хуьре чпихъ алакьунар авай, амма мумкинвилер авачир аялар гзаф авайди аннамишна.

100-110 аялдиз чка жедай цlийи центрада аялриз къецепатан чlаларай, робототехникадай, астрономиядай ва астрофотографиядай чирвилер гуда.

Къейд ийин, марифатдин макан ачухунин шад мярекатда иштиракун патал гзаф кьадарда мугьманар, кьилди къачуртlа, Москвадай, республикадай илимдинни образованидин, Гьукуматдин векилар, РД-дин образованидинни илимдин министерстводай министрдин кьилин заместитель Альбина Арухова кьиле авай десте, «Сулейма-Стальский район» МР-дин Кьил Нариман Абдулмуталибов ва хейлин масабур атанвай.

«Лезги газет»


Всего просмотров: 86

Читайте также: