Ахпа геж жеда

Махачкъала шегьердин бязи районра кьакьан мертебайрин кIвалера яшамиш жезвайбур югъди-йифди элуькьзавай иесисуз кицIерикай икрагь хьанва. Йикъан кьарай, йифен ахвар квахьзава. Пехъи хьанвай кицIе­ри инсанрал вегьей дуьшуьшарни тIимил туш. Са гафуналди, им хци месэла яз амукьзава.

Гьелбетда, и кардин пата­хъай муниципалитетдин администрациядиз арза кхьин дуьз я, гьикI лагьайтIа, иесисуз кицIе­рин патахъай жавабдарвал муниципальный органрин хиве ава. Гьукумдин идарайриз хабар гайидалай кьулухъ вуч же­да? Иесисуз кицIер сифте кьуна гьайванрин духтурдин патав, гуьгъуьнлайни­ иесияр авачир ки­цIер, кацер хуьдай махсус чка­диз хутахда лгьана фикирзавани куьне?

Эвел акI жезва хьи, авайди са месэла я — иесисуз кицIерин лу­жар. Амма и месэла айсбергдиз ухшар я, вичин асул пай оке­андин деринра чуьнуьх хьанвай. Вучиз къе республикадин бязи шегьеррин агьалийриз куьчедиз экъечIиз кичIезва? Туьквендиз фу маса къачуз ракъурай аялдал пехъи хьанвай кицIер гьалтун мумкин я. Я тахьайтIа, йифиз геж кIвалахдилай хкведайла инсандал гьужумун.

Иесисуз кицIерин вилик пад кьунин жигьетдай кьиле тухузвай кIвалах къайдадик кутуна кIанда. Дагъустанда иеси авачир гьайванар хуьдай са центр кардик ква.  Вични волонтеррин куьмекдалди эцигнавай. Эгер рикIе экуь къастар авай инсанри ихьтин центр арадал гъаначиртIа, бес иеси ава­чир гьайванрин кьис­мет гьихьтинди жедай? Зи фикирдалди, гьалар авайдалайни пис жедай.

Мукьвара заз интернетдай кицIери инсандал вегьезвай видеоролик акуна. Гена гьа арада па­тавай машиндаваз физвай ­гадайрикай куьмек хьана пехъи хьанвай гьайванрин есирда ­гьатайдаз. Амма и видеоролик халкьдин гегьенш къатарив агакь­­наватIани, жавабдар гьич са къурулушдини и вакъиадиз фикир ганач. Хирер-кьацIар хьунал, Аллагьди яргъазрай, кьиникьар арадал атунал вил ала жал? Ихьтин дуьшуьшра гъиле-гъилди лазим тир серенжемар кьабулна кIанда. Ахпа геж жеда.

Бела  Ашурбегова,

ДГУ-дин филфакдин

3-курсунин студентка


Всего просмотров: 100
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире