Агъсакъалдин месэлаярни дердияр

“Гьуьрметлу “Лезги газетдин” редакцияда кIвалахзавай юлдашар!  Квез чар кхьизвайди Кьурагьа яшамиш жезвай, Ватандин ЧIехи дяведин вахтунда далу пата зегьмет чIугур Ниби Рамазанов я. Заз зи багъри газет гзаф кIанда. Амма заз гузвай пенсия 12 000 манат я. Гьуьрметлу юлдашар, квевай жедачни дяведин иштиракчийриз ва ветеранриз газет са тIимил ужуздаказ кхьидайвал ийиз?

Мукьвара заз яшар 70 йисалай алатнавай пенсионерриз электроэнергия ва  газ 50 процентдин, 80 йисалай алатнавайбурузни гьавайда ишлемишдай ихтияр ава лугьудай ванер атанва. Ибур дуьз гафар яни?

Заз мадни хабар кьаз кIанзава: яшар 80-далай алатнавай ксариз гьукуматдин патай мад  гьихьтин кьезилвилер ава?

Инал заз жувакай куьруь суьгьбетни ийиз кIанзава. Зун 1933-йисуз дидедиз хьана. Захъ  11 аял ава. Кьве аял ва уьмуьрдин юлдаш рагьметдиз фена. Амай веледар Рос­­сияда, чпин кIвал-югъ­ кутуна, яшамиш жезва. Зун хуьре текдиз ава. Са тIимил вахтар идалай вилик Кьурагьа къати гарар акъатна. Зи кIвалел алай шиферар гару кукIварна. Къуншийрин куьмекдалди къав са бубат дуьзар хъувуна. Зун хьтинбуруз райондин администрациядай куьмекун лазим яни?

Виликдай заз Россиядин Президент Владимир Путиналай  Гъалибвилин йикъаз талукь яз тебрикдин чарар хквезвайди тир. Амма 2010-йисалай кьулухъ заз са кагъазни мад хтанач­. И кардин себеб вуч ятIа, зи кьил акъатзавач. Чидач зи фамилия, тIвар ву­чиз квахьнаватIа.

ТIалабзава заз са жаваб гун”.  

Чарарин  отдел:

Чак Ниби Рамазанован чарчи еке къалабулух­ кутуна. Инсанар кьуьзуь хьайила текдиз­ амукьун, гьелбетда, шад жедай кар туш. Амма уьмуьр­да инсанрихъ гьар садахъ вичин кьис­мет ава.

Яшлу касдилай агакьай чарчин гелеваз чун са кьадар вахт хьана. Талукь идарайриз чарар (запрос) ракъурна, бязи чкайриз зенгерна.

“Лезги газет” кхьиниз талукь месэладикай вуч лугьун! Эхь, дугъриданни, газетдин къимет­ гзафбуруз багьаз аквазва. Къведай йис патал адан къимет 854 манатни 76 кепек (яни саки 34 манатдин хкаж) хьанва. Редакциядиз а кьадар пулуникай къвезвай къазанжи анжах 325 манат я. Амайди почтадиз амукьзава. Гьуьрметлубур, чун чи кIелчийрив га­зет жезмай кьван ужуз агакьарунин терефдарар я, амма, чалай, редакциядин коллективдилай, гьайиф хьи, вири крар аслу туш.

Ниби Рамазанова хабар кьазвай месэладикай – яшар 70 йисалай алатнавай пенсионерриз электроэнергия ва газ 50 процентдин, 80 йисалай­ алатнавайбурузни абур гьавайда ишлемишдай ихтияр авани-авачни чирун патал чна Кьурагь райондин агьалийриз яша­йишдин рекьяй куьмек гудай управленидиз зенгна. Анин регьбер­ Жама­лдинов Сейфудин Мегьамедалимовича хабар гайивал, Ниби Рамазанов управленидин учётда, яни анай куьмек агакьзавай ксарин жергеда ава. Вичиз коммунальный къуллугърай гун ла­зим тир кьезилвилерикай ада ла­зим къайдада менфят къачузва. Кьилди къа­чуртIа, газ ва электроэнергия ишлемишунай кьезилвилер гузва. Сейфудин Мегьамедалимовича чун мадни гъавурда турвал, къенин юкъуз яшариз килигна (гьатта 100 йис хьанвайбурузни) газ ва электроэнергия гьавайда ишлемишдай закон ва я ихти­яр­ авач.

“Чаз, яшар 80-далай алатнавай ксариз, гьуку­матдин патай гьихьтин кьезилвилер ава?” – лу­гьудай суални чи вилик эцигнава агъса­къалди. Алай йисан 19-июлдиз чапдай акъатай “Лезги га­зетдин” 29-нумрада авай, “Азад авуникай хабар авач” макъалада и суалдиз тамамдаказ жаваб ганва. Квевай а макъала­дикай менфят къачуз жеда. Кьилди къачуртIа, ана 70 йисалай (яшар 80-далай алатнавайбурни акатзава эхир) алатнавай агьалияр транспортдилай къачузвай, юзан тийидай эменни (кIвал) маса къачудайла, эменнидилай гузвай на­логрикай азад авуникай ва икI мад кьезилвилерикай кхьенва.

Ниби Рамазановича мукьвара къати гарар акъатуникди вичин кIвалерин къавар тух­ван­вай­дакайни, абур къуни-къуншийрин куьмекдалди са бубат туьхкIуьр хъувунвайдакайни кхьенва. Чна умудзава, райондин кьиле авай ксари лазим серенжемар кьабулда. КIеве гьатнавай яшлу касдив яргъал тевгьена куьмек агакьарда. Агъсакъалдиз чна ихьтин вахтара райондин администрациядиз, арза кхьиналди, хабар агакьарунин меслят къалурзава.

Яшлу касдин рикIик дарихвал кутунвай месэладикай – Владимир Путинан къул алаз тебрикдин чарар хтун тавуникай – чна РФ-дин Президентдин администрациядин сайтдиз чар рекье тунва. Геж-фад чавай лугьуз жедач, анай гьихьтин жаваб агакьайтIани, чна куьн хабардарда, гьуьрметлу Ниби Рамазанович.


Всего просмотров: 40

Читайте также: