Агалкьунар къейдна

Дагъустан Республикадин Кьил Владимир Васильев UFC-дин чемпионатдин гъалибчи Гьабиб Нурмегьамедовахъ ва адан буба, тренер Абдулманап Нурмегьамедовахъ галаз гуьруьшмиш хьана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.

Гуьруьшдин сергьятра аваз В.Васильева UFC-дин чемпиондиз гележегда мадни еке агалкьунар хьун алхишна ва региондин виниз тир шабагь – “Дагъустан Республикадин вилик лайихлувилерай” орден, Абдулманап Нурмегьамедоваз лагьайтIа, “Дагъустан Республикадин физический культурадин ва спортдин хиле лайихлувилерай” медаль гана. Шабагь вахкудайла, Владимир Васильева ихьтин машгьур акъажунра сифте яз россиявиди гъалибвал къазанмишуник ада кутунвай пай къейдна.

РикIел хкин, “Дагъустан Республика­дин вилик лайихлувилерай” орден яша­йишдинни экономикадин жигьетдай республика вилик тухунай, гьакIни илимдин, медениятдин ва спортдин хилера агалкьунрай гузвайди я.

Гуьруьшдин эхирдай Дагъустандин Кьили Гьабиб Нурмегьамедов политикни хьанвайвилин гьакъиндайни вичин фикир лагьана, ада кардиз вичин хсуси къимет гузвайди ва дуьньяда адан машгьурвал къейдна. “Ша чна Дагъустандин, Россия­дин халкьарин хийирдиз, куьне куь уьмуьр бахшнавай спортдин рекьяй саналди гьикI кIвалахдатIа фикирин. Сагърай­­­ куьн”, – алава хъувуна региондин Кьили­.

Гьабиб Нурмегьамедова вичин агалкьунриз республикадин регьберри виниз тир къимет гунай сагърай лагьана: “Заз медалар фадлай ганвачир, эхиримжиди 2011-йисуз дуьньядин Кубокдал тир. Адалай кьулухъ пешекар хьиз экъечIза­вай ва анин гъалибвилер официальный зачётдик акатзава, абурай пулдин такьа­тар гузва, медалар авачир. Владимир Васильева ихьтин виниз дережада аваз къимет ва виниз тир шабагь гунал гзаф шад я. Спорт вилик тухунин жигьетдай, ин­санриз чпин такьатар серф ийиз кIан­за­вай инвестицийрин проектар гзаф ава. Чун абурукай къведай гуьруьшдал тамамвилелди рахада”.

Мярекатда РД-дин Кьилин ва Гьукуматдин  Администрациядин Руководитель Владимир Иванова, республикадин Сад лагьай вице-премьердин везифаяр тамамарзавай Анатолий Къарибова, физический культурадин ва спортдин министрдин везифаяр вахтуналди тамамарзавай Мегьамед Мегьамедова, Да­гъустандин зегьметдин ва яшайишдин жи­гьет­дай вилик тухунин министрдин везифаяр вахтуналди тамамарзавай Расул Ибрагьимова иштиракна.

 


Всего просмотров: 18

Читайте также: