Адан кIвалахдилай рази я

Докъузпара райондин ЦIийи Къаракуьредин фельдшервилин пунктунин заведующийвиле кIвалахзавай  Эскендаров  Назим  Абусаатовича  и хуьруьн агьалийрин патай лайихлу гьуьрмет къазанмишнава. И кар паталди жегьил пе­ше­карди, югъ-йиф талгьана, гьар атай зенгиниз кIусни инжиклу тушиз жаваб гузва. Герек тир медицинадин алатар гъи­лик авуна, ада талукь чкадал начагъ инсандин гьал ахтармишна, тади гьалда сифтегьан куьмекдин везифаяр кьилиз акъудзава.

Назим Эскендеров 1989-йисан апрелдиз Къаракуьреда дидедиз хьана. 2003-йисалди ада къадим хуьруьн мектебда кIелна. Ахпа ЦIийи Къаракуьредиз куьч хьана, диде-бубади  ина кIвал-югъ кутунвай. 2006-йисуз мектеб акьал­тIарай жегьил Дербент шегьердин гзаф хилерин медколледждиз гьахьна. 2008-2010-йисара Дербентдин ЦРБ-да тежриба къачуна. Жегьил пешекарди зегьметдин рехъ Къаракуьре хуьре башламишна. Ана На­зима ФАП-дин фельдшервиле са йисуз кIвалахна. 2011-йисалай ада, винидихъ къейднавайвал, ЦIийи Къаракуьредин фельдшервилин пунктунин заведующийвилин везифаяр кьилиз акъудзава.

Хуьре 950 агьали ава. Абурукай 18 йи­сан яшдалди къведай аялрин кьадар 327 я. Фельдшервилин пункт хуьруьн ад­министрациядин дараматда кардик ква.  Ам кьабулдай ва сагъламвал мягькемардай къуллугъар кьилиз акъуддай кьве кIва­ликай ибарат я.  Абур медицинадин алатралди, тадаракралди бегьем таъмин туш. Мебель куьгьне хьанва. 2017-йисалай лагьайтIа, ина пардалди чим гудай къайда кардик кумач, гьавиляй хъуьтIуьн вахтунда къуллугъчийри электроэнергиядин пичер ишлемишзава.

Къулай шартIар авачтIани, акушерка Адилова Диларади, медсестра Генжалиева Альбинади ва санитарка Мегьамедшарифова Шаниседи чпин везифаяр намуслувилелди тамамарзава. Медицинадин къуллугъчийри начагъ инсанар датIана чпин гуьзчивилик кутазва, кIвалериз физ, абурун гьал ахтармишзава, чарасуз куьмекар гузва. Абуру чпихъ авай мумкинвилерикай менфят къачуналди, азаррин вилик пад кьунин серенжемар кьиле тухузва.

ЦIийи Къаракуьреда ФАП ахъаюн вахтунин истемишун я. Чна умуд кутазва хьи, республикадин здравоохраненидин министерстводи и кардиз мукьвал вахтара фикир гуда ва ина вири шартIа­ралди таъмин тир ФАП-дин цIийи дарамат эцигда.

Шагьбала  Шагьбалаев


Всего просмотров: 46
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире