Адалатлудаказ жеда лугьузва

Дагъустан Республикадин Гьукуматди 2018-йисан мартдиз кьабулай  къарардин бинедаллаз РД-дин чилерин ва эменнидин  алакъайрин министерстводи  республикадин  чилер инвентаризация авунин кIвалах башламишнай.  Гьа и йисалай РФ-дин Президентдин тапшуругъдалди республикада  газдин сетрин   инвентаризацияни гъиле кьунай.

И рекье авур кIвалахрин нетижайрикай  саласа юкъуз кьиле фейи пресс-конференциядал РД-дин чилерин ва эменнидин алакъайрин министр Агъарагьим Къагьиргьажиева суьгьбетна.

Малум хьайивал, республикадин вири чи­лерин санлай къачур кьадар 1,8 миллион гектардиз барабар я. И чил 3048 участокдикай ибарат я. Абурукай 1000 участок къенин йикъалди инвентаризация авуна акьалтIар­нава. МасакIа лагьайтIа, абур тамамдаказ ах­тармишнава, гьисабдиз къачунва.

Кьиле тухванвай кIвалахдин нетижайриз  цIийиз арадал гъанвай “Дагъустан Республикадин къацу фонд” порталда килигиз жеда. Интернетда жедай и сайт алай йисан январдин эхирра-февралдин эвелрай майдандиз акъудда, адахъ галаз танишарда.

2019-йисуз Дагъустандин Минимуществодин къурулушдик квай “Дагтехкадастр” ГБУ-ди хуьруьн майишатдин тайинвал авай ва хуьрерин чилериз, гьакIни юзан тийидай эменнидик акатзавай объектриз кадастровый къимет гунин кIвалах  кьиле тухвана ва нетижаяр тестикьарна. Алатай йисан вахтунда гьакIни капитальный эцигунрин 702,4 объект­дин, 139,2 агъзур гектар хуьруьн майишатдин тайинвал авай ва 822,3 агъзур гектар  республикадин хуьрерин чилерин — санлай къачурла, 1,6 миллион объектдин кадастрдин къимет тайинарнава.

И кIвалахар кьиле тухудайла, чилерин сергьятриз винелай, яни цавай килигун патал,­ малум хьайивал, квадрокоптерар ва пилот галачиз идара ийиз жедай  самолетар ишлемишна.

ИкI, алатай йисуз  Минимуществоди  Махачкъаладин мулкар цавай тамамдаказ ахтармишна ва шегьердин ортофотоплан туь­кIуьрнава.

Алай вахтунда ам координатрин сеткадихъ галаз алакъалу авунва ва ида чпикай дуьз делилар къалур тавунвай, законсуздаказ кьунвай чилер ачухарзава, маса гьар жуь­редин  нукьсанар винел акъудзава. Карта Росреестрдиз рекье твада. Министрди ха­бар гайивал, гьа ихьтин кIвалах  республикадин амай вири мулкарани тешкилда. Ге­гьенш майданра кадастрдин кIвалахар тухунин асул шартIарикай сад республикадин вири мулкуниз талукь картаяр туькIуьрун я.

2019-йисуз Дагъустандин чилерин ва эменнидин алакъайрин министерстводи  2020-йисан 1-январдилай чпелай къачузвай налог объектдин кадастрдин къиметдилай ас­лу яз тайинардай объектрин сиягь туькIуьр­нава. Сиягьда, санлай къачурла, 13011 объект ава. «Вири адалатлудаказ жеда. Эгер куь  эменнидиз талукь яз къалурнавай делилар дуьзбур яз гьисабзавачтIа, буюр, хабар це чаз, чун гъалатIар туькIуьр хъийиз гьазур я», — лагьана  А.Къагьиргьажиева.

Газрин сетрихъ галаз алакъалу гьаларни, малум хьайивал, муракаббур тир. Бязи чкайра са турбадихъ са шумуд иеси хьанвай — республика, муниципальный тешкилат, гьатта кьилдин ксарни. Ихьтин гьалар алатай асирдин 90-йисара  газдин сетрин бязи участокар приватизация авун себеб яз арадал атанвай. Хабар гузвайвал, и кIвалах 2020-йисан эхирра куьтягьда.

Министрди гьакIни  муркIадин арена туькIуьрун патал 6 гектар чил чара авунвайдакайни  лагьана.

РикIел хкин, гьеле алатай йисан мартдиз Дагъустандин Кьил В.Васильева Махачкъалада, шайба галай хоккейдал машгъул жедайвал, алай аямдин муркIадин арена туь­кIуьрдай  фикир авайдакай лагьанай.

“Чилин участок чара авунва, тахминан 6 гектар, анал муркIадин арена туькIуьрда. Зи фикирдалди, хоккей дагъустанвийрин къилихдихъ галаз кьадай спортдин жуьре я. Им менфятлу кар хьун лазим я”, — лагьана министрди. Ам  Махачкъаладинни Каспийскдин арада авай ипподромдин чилел жеда.

Жасмина Саидова


Всего просмотров: 21
Подпишитесь на наши каналы:

Читайте также:


Новости партнеров