Адалай рази я

Ахцегь райондин Мацарин хуьре яшайишдин къулай шартIар такур, хипехъанвилелни малдарвилел маш­гъул хьайи рагьметлу Мамедкеримов Абузер халуди вичин уьмуьрдин юлдаш рагьметлу Гуьлейсер халани галаз 8 аялдиз тербия гана ва абурукай кIвалин-къан иесияр авуна.

Заз абурун хва Самединакай суьгьбетиз кIанзава. Самедина 8-класс Маца, 9, 10- классар Ахцегьа акьалтIарна. 2 йисуз Армиядин жер­гейра къуллугъна. Гуьгъуьнлай Дербентдин хуьруьн майишатдин техни­кум хъсан къиметралди акьал­­­тIар­на.

Хуьруьнвияр  куьч хьайи, вичик Бут-Къазмаяр, ЦIийи хуьр, Къличхан акатай “Комсомольский” сов­хозда Самедина 2 йисуз Бут-Къазмайрин участокда агрономвиле, I8 йисуз бригадирвиле кIвалахна. Зегьметда къазанмишай агалкьунрай адаз райондин, совхоздин патай грамотаяр, премияр гана. 4 сеферда КПСС-дин обкомдин гъиляй-гъилиз къведай Яру пайдахдиз лайихлу хьайи “Комсомольский” совхоздин  агалкьунрик  Самединан пайни ква.

2006-йисалай Самедина Бут-Къазмайрин юкьван школада завхозвиле кIвалахзава. Ам чIехи хизандин­ кьил я. Вичин уьмуьрдин юлдаш Сагьибатахъ галаз санал хизанда кьуд аял тербияламишна, абуруз кьилин образование гана. Пашадини Ражидина контрактникар яз къуллугъзава, Минаради Махачкъалада са мектебда  географиядин тарсар гузва, Эльнара кIвалин кайвани я.

ЦIийи школадин дараматда ми­хьивал, чимивал хуьзва, гъвечIи аял­­риз чими тIуьнар гузва ва икI мад. Аялар, абурун диде-бубаяр сто­ловойда гузвай тIуьнрал рази я.

Ана лацу халатар алай Ширинова Тамила – повар, Мухтарова Эф­сани адан куьмекчи я. Хуьрекрин тIямлувал школадин медсестра Гьасанова Тамилади ахтармишзава.

Ширинов Жаруллагь Самединан эрчIи  гъил я. Ада вичин вези­фа­яр дуьздаказ кьилиз акъудзава: столар, стулар, ракIарар, пенжерар, ятар авахьзавай чкаяр туькIуьр хъийизва, дапIарар, лампочкаяр де­гишарзава.

Самединан кIвалахдилай вири рази я.

Желил Желилов


Всего просмотров: 19

Читайте также: