Ада Никулин сагъарнай…

СултIан-Агьмед  Мегьамедович  Му­тIа­либов. Вичин­ уьмуьрдин эхиримжи юкъуз 82 йис хьанвай духтур, адет хьанвайвал, экуь­нахъ поликлиникадиз кIва­лахал фена. Гьамиша хьиз азарлуяр кьабулна, абурун арзайрихъ яб акална, бязибуруз диагнозар эцигна. Санал кIвалахзавай юлдашри чпиз Сул­тIан-Агьмед Мегьамедович эхиримжи сеферда ахквазва лагьана, гьич фикирни ийидачир. КIвализ хтайла, хуруда тIал гьиссна, ме­сел ярх хьайи духтур мад къахрагънач.­

Гележегдин машгьур хирург 1926-йисуз Кьасумхуьрел дидедиз хьана. 1948-йисуз Ке­ферпатан Осетиядин медуниверситет акьалтIарай ам Бурят-Монголиядиз акъатна. Пешекарвал хкажун патал Къазанда авай чIа­вуз ам Гуьзел тIвар алай медсестрадал ашукь­ хьана ва 1952-йисуз абуру чпин кьисметар сад авуна.

Татарстандин урологиядин бине кутур духтуррикай сад СултIан-Агьмед Мегьамедович я. Ада 1963-йисуз Къазандин ракьун рекьерин духтурханада урологиядин отделе­ние ачухна ва 1987-йисалди аниз регьбервал­ни гана. Адалай кьулухъ вичин эхиримжи не­фесдалди Къазанда ветеранар патал кардик квай поликлиникада зегьмет чIугуна. Адаз ви­рида “Аллагьдин патай тир хирург” лугьудай. Духтурди авур надир операцияр себеб яз, Татарстанда аялар тежезвай гзафбуруз бубавал вуч ятIа чир хьана. Фаллопластикадай Сул­тIан-Агьмед Мегьамедовича авунвай кIуьд операция исятдани уьлкведа виридалайни надирбур яз гьисабзава. Адахъ галаз санал кIвалахай юлдашрин рикIел хкунрай ма­лум жезвайвал, духтурди операция авур дуркIунди сагъдалайни хъсандиз кIва­лах­дал­дай. Къейд ийин хьи, пешекарвилин рекье кьилел атай бязи вакъиаяр себеб яз, СултIан-Агьмед Мегьамедовича гьатта гинекологдин, травмотологдин, инфекционист­дин,­ судмедэкспертдин везифаярни тама­марна­.

Медицинадин рекьяй акьалтIай алакьунар авай ам Татарстанда виридалайни хъсан уролог яз гьисабзавай. Адан патав вири Россиядай азарлуяр къвезвай. Виридан рикI алай актер Юрий Никулинани чи ватанэгьлидивай куьмек тIалабнай. СултIан-Агьмед Ме­гьамедовича вичин сагъламвал тамамдиз мягькемар хъийидалди, Никулин Къазанда амукьнай.

Танишри рикIел хкизвайвал, СултIан-Агьмед МутIалибов гзаф агъайна, заха инсан ялдай. Ам садрани тIвараринни шабагьрин суракьда хьанач. Гьахьтин алакьунар авай духтур “Здравоохраненидин отличник” знакдизни “Жуьрэтлу зегьметдай”, “Зегьметдин ветеран” медалриз лайихлу хьана.

Гьазурайди – Агьмед Магьмудов


Всего просмотров: 157

Читайте также: