Жавагьиррин къешенг чешме

И шикил чи редакциядив агакьарайди Социализмдин Зегьмет Игит, къурушви Сейфедин Къулиеван хтулрикай тир Рамазан Къулиев я. Адаз и “тарихдин шагьид” Дагъустандин государстводин архивдай жагъана. Шикилдай чаз аквазвайди вири дуьньядиз машгьур Союзрин КIва­­лин Колонный зал я. Генани керчекдиз лагьайтIа, ана Дагъустандин халкьдин шаир, XX асирдин Гомер СтIал Сулейманан 100 йис тамам хьуниз талу­кьар­­­­навай шадвилин мярекат кьиле ­физвай вахт. Архивда авай документра къейд­­навайвал, и межлис 1969-йисан 1-сентябрдиз кьиле фена ва шикил ­ягъайди  Р. Дик  я.

Лагьана кIанда, Колонный залда гьар нин хьайитIани мярекатар тешкилзавачир. Ихьтин гьуьрметдиз уьлкведин тарихда кье­тIен гел тунвай, халкьдиз, жемиятдиз машгьур кьегьал рухваярни рушар ла­йихлу жезвай. Советрин Союздин кьиле авай регьберри агъастIалви Сулейман гьахьтинбурукай сад яз гьисабзавай. ­Ам­ма чIехи шаирдихъ авай кесер, сей­ливал тек са и кардалди акьалтIзавач. Адан эсер­рал неинки Советрин Союзда, гьакI жуьреба-жуьре маса уьлквейрани гьейранвалзавай. Шаирдин тIварцIихъ чи, гьакI са жерге къецепатан уьлквейрани куьчеяр янава. Дагъустанда адан тIвар алай район ава. И сиягь мадни давамариз жеда.

Дагъларин уьлкведин тIвар вири ­дуьньядиз машгьур авур чIехи шаирдин цIи 150 йис тамам жезва. Адет яз, Да­­гъус­тан­­­­­дин баркаллу векилрин юбилеяр къейд­­дайла, гьеле йисан эвел кьиляй талукь ­указар акъуд­да, тухвана кIанзавай мя­ре­катрин план туькIуьрда, жавабдар ксар тайи­нарда, ма­са серенжемарни кьабулда. Амма РД-дин Гьуку­мат­­дай редакциядиз хабар гайивал, республикадин руководстводи XX асирдин Гомеран юбилейдиз талукь указ гьелелиг акъуднавач.

Дагъустандин советрин литерату­­ра­дин бине кутурбурукай сад тир СтIал Су­­лейма­­нан 150 йисан юбилейдиз талукь мя­­ре­кат­рин план чаз РД-дин культурадин ми­­нис­терстводай ракъурна. Планда­­ ­къа­­­­лурнавай мярекатрин патахъай жа­­вабдарвал РД-дин культурадин мини­­с­тер­­­стводин, писателрин Союздин ва Сулейман-Стальский ­райондин админист­рациядин хиве ава. ­Мярекатрикай чпикай рахайтIа, а планда къалурнавайвал, 28-апрелдиз Дер­бентдин дуьньядин культурайрин ва динрин та­рихдин музейда,          6-майдиз­ Ма­хач­къалада Р.Гьамзатован тIвару­нихъ га­лай­ Милли­ ктабханада ­шаирдин уьмуьр­дин ва яратмишунрин рекьиз талукьарнавай выставкаяр ачухда. Майдин вацра аялрин Н.Юсупован тIва­ру­нихъ галай рес­публи­кадин ктаб­ханада­ СтIал Сулейманан эсерриз талукь выс­тавка­ярни суьгьбетар кьиле фи­да. 17-майдиз Махачкъалада, шаирдин тIвару­нихъ галай бульварда авай гуьмбетдин патав гьар йи­суз тухузвай митинг тешкилда. Гьа и йи­къан нянин сятдин вадаз Урусрин театрдин чIехи залда СтIал Сулейманан юби­лейдиз бахшнавай межлис тухуда. 18-майдиз юбилейдин шадвилер Агъа СтIалдал давам же­да. 20-25-майдиз Дер­бентда, Лезгийрин госмуздрамте­атрда, “XX асирдин Гомер” тIвар алай фестиваль кьиле фи­да. Да­гъус­тандин халкьариз девлетлу ирс тунвай шаирдин юбилейдин мярекатрин план, чи фикирдалди, генани гегьеншди хьун лазим я.

СтIал Сулейман

ХХ асирдин Гомер­ чIехи дережадин пландиз лайихлу я. “Сулейманан тIва­рунихъ галаз алакъалу яз чи гьуьл генани дерин ва гегьенш, дагълар лагьай­тIа, генани кьакьан хьана”, — ихьтин дуьзгуьн, виниз тир къимет ганай СтIал Сулейманаз Расул Гьамзатова. Халкьдин шаирдин юбилейдиз талу­кьарна, илимдинни тежрибадин са конференция, рес­­пуб­ликадин ва районрин дережада аваз Сулейманан эсерар кIел­дайбурун конкурсар, муаллимрин арада шаирдин яратмишунриз талукьарнавай ачух тарсар тухунин конкурс теш­кил­­найтIа, цIийи ктабар акъуднайтIа… кутугай кар жедай. Чна планда къалурнавай мя­рекатрал винидихъ къейднавай пуд къурулушдилай гъейри, республикадин маса ведомствояр, муниципалитетрин администрациярни  желб авун теклифзава.

СтIал Сулейман Дагъустандин кьилин винизвал, дамах я. Инлай кьулухъ виш йиса­рани гьакI яз амукьда. Акьалтзавай несилрин­ мецерал адан жавагьирар гьамиша алаз же­да, гьикI хьи, а чIа­лар гьамиша жегьил, жан­лу ва эбеди я. Гьакъикъи шиират садрани ре­кьидач.

Мегьамед Ибрагьимов, «Лезги газетдин» кьилин редактор


Всего просмотров: 89

Читайте также: