Дуьньяда

Сириядиз къуват гузва

Россиядин военныйри Сириядин Тартус портуниз пар авай са шумуд гими ракъурна. Идакай “Al Masdar News” чешмеди хабар гузва.

Малумарзавайвал, и йикъара Новороссийскдай Сириядиз Россиядин “Спарта-3” гими рекье гьатна. Чlехи гимиди Сириядин гьукуматдин яракьлу кьушунриз ва абурун терефдарриз военный пар тухузва. Идалай­ гъейри, и мукьвара Россиядай Сириядиз мадни са гими фена. Чешмеди къейдзавайвал, ада военный техника, гьа жергедай яз БМП ва танкар авай.

28-августдиз малумарайвал, Россияди Сириядин къерехда авай женгинин гимийрин десте къуватлу авуна. Адак алай вахтунда цин ви­нелай фидай 10 гимини  цин кlаникай фидай 2 луьткве ква.

Нурмегьамедов магълуб жедач

Россиядин какахьай жуьредин женгерин (ММА) машгьур пагьливан Гь. Нурмегьамедован тренер Хавьер Мендеса инанмишвилелди малумарайвал, Гьабиб садрани кумукьдач. Адан гафар “MMA Mania” чешмеди раижнава.

“Зун инанмиш я, Гьабиб психологиядин жигьетдай акьван къуватлу я хьи, ам садрани магълуб жедач. Зи ва я вичин куьмекдалди ада гъалиб­вал къачудай рехъ жагъурда”, – малумарна Гьабибан насигьатчиди.

Къейд авурвал, Гьабибан гьалди Мендесак къалабулух кутазвач.

“Четин гьич са месэлани жедач. Зун инанмиш я, Конор Макгрегорахъ­ галаз бягьс тухудайла, Гьабиба вич эхирдалди секиндиз тухуда”, – лугьузва Мендеса.

Макгрегоранни Нурмегьамедован арада бягьс 6-октябрдиз Лас-Вегасда кьиле фида. UFC 229 турнирдин кьилин бягьсина чемпионвилин чlул патал женг тухуда, алай вахтунда и чlулунин сагьиб Гьабиб я.

Нурмегьамедов садрани магълуб хьанвач, ада пешекарвилин 26 бягьсина 26 гъалибвал къачуна.  Макгрегорахъ 21 гъалибвал ва пуд магълубвал ава. Ам UFC-дин виликан чемпион я.

Тахсиркарар кьаз куьмекнай

Россиявийривай тахсиркарвилер винел акъудунин ва тахсиркарар кьунин кардиз куьмек гунай пишкеш яз са шумуд миллион кьван манат къачуз жеда. МВД-дин и месэладиз талукь къарар 27-августдиз къуватда гьатна. Пишкеш яз гудай пулдин кьадар 50 агъзурдалай 10 миллиондив кьван агакьда. 500 агъзурдав кьван агакьнавай пулдин пишкеш МВД-дин территориальный органдин кьиле авайдан ва я адан заместителдин къарардалди тайинарда, 3 миллион манатдал кьван – МВД-дин кьилин заместителдин, 3 миллиондилай виниз – министрдин къарардалди. Информация агакьарайдаз нагъд пулни гуз, гьакI банкдин счетдизни ягъиз жеда.

Къенин йикъалди полицияди, лап хаталу тахсиркарар кьунай пишкеш хиве кьуналди, пулдин такьатар гузвай. Къейд ийин, къайдаяр хуьдай органра махсус фонд авач, гьар са гьакъикъи дуьшуьшдиз килигна, министерстводин къенепатан ресурсрай такьатар чара ийида.

Украинадиз ракъурна

Украинадин сергьятриз США-дайни Канададай вини дережадин аскерар фенва. Идан гьакъиндай «Новости» РИА-ди хабар гузва.

“56 лагьай мотопехотадин ва 406 лагьай артиллериядин бригадайриз гзаф кьадарда къецепатан военный къуллугъчияр атанва”, – кхьизва чешмеда.

ДНР-дин яракьлу кьушунрин пресс-къуллугъдин векилди къейдзавайвал, уьлкведиз атанвай аскеррини командирри Украинадин яракьлу къуватри (ВСУ) гьазурвал аквазвай гьужумдин операцийра иштиракда.

30-августдиз США-дин армиядин министр Марк Эспера хиве кьурвал, Пентагонди чпин пешекарар Украинадиз ракъурна.

Дипломат ахъайнач

Украинадин сергьят хуьзвай аскерри чпин уьлкведин мулкариз Россиядин дипломат ахъайнач. Идан гьакъиндай Украинадин госпогранкъуллугъдин сайтди малумарзава.

“Украинадиз финал къадагъа алай Россиядин дипломат Харьковдин­ сергьят хуьнин отряддин къуллугъчийри чпин уьлкведиз ахъайнач. Адаз, гуьзчивалдай “Харьков-пассажирский” пунктунилай элячlна, “Моск­ва-Харьков” поездда аваз чи уьлкведин сергьятриз физ кlанзавай”, – малумарна Украинадин сергьятар хуьзвай къуллугъди.

Документар ахтармишдайла, сергьят хуьзвай аскерри тайинарайвал, поездда аваз физвайбурукай сад Харьковда РФ-дин генеральный консульстводин кьвед лагьай секретарь я. Малум хьайивал, вичин тlвар кьун тавунвай дипломатдиз 2023-йисалди Украинадиз гьахьдай ихтияр авач.

Харжияр раижна

“Яроваядин къанун” кьилиз акъудунин харжийрин пай Россияда кlва­лахзавай къецепатан уьлквейрин “Google” ва “Facebook” чlехи интернет-компанийри чпин хивез къачун чарасуз я. “Reuters” чешмеди малумарзавайвал, ихьтин законопроект “Мегафон” ва “Ростелеком” телекоммуникационный тешкилатри арадал гъанва.

Законопроектдал асаслу яз, къецепатан тешкилатар Россияда “Интернетда информация раижзавай къецепатан уьлкведин инсанди гуьзчивал тухузвай тешкилатчи” яз тайинарзава. Сайтдикай менфят къачузвайбуру сада-садаз ракъурзавай делилар хуьнай и тешкилатар вилик жергейра авай алакъа­дин операторриз такьатар гуниз мажбурда. Эгер и тешкилатри харжийрин са кьадар пай чпин хивез къачун тавуртlа, Роскомнадзордивай а ресурсрин кlвалахдин йигинвилел сергьят эцигиз жеда.

8-августдиз “Яроваядин къанун” тамамарунин карда онлайн-компанийрин харжияр малум хьанай. Машгьур интернет-компанияр тир “Яндексди” ва Mail.Ru Group-ди 9 миллиард манат кьван гьакъи гуда. Алай йисан 28-июндиз Россиядин гьукуматди уьлкведин сергьятда кардик квай вири интернет-сервисар абурукай менфят къачузвайбурун вири делилар 6 вацра хуьниз мажбурна. Кьилди къачуртlа, а делилрик малуматар, сесинин информация, шикилар ва видеояр акатзава.

Гьазурайди – Куругъли Ферзалиев


Всего просмотров: 38

Читайте также: