Дамах авуниз лайихлу я

4-августдиз Дагъустандин Гьукуматдин Председатель Артем Здунов ва РД-дин хуьруьн майишатдин ва недай суьрсетдин министр  Абдулмуслим  Абдулмуслимов, Дагъустандин государстводин аграрный университетдин  ректор Зайдин Жамбулатовни галаз,  вуздин  патав кардик квай нек гьялдай ва некIедин продукция акъудзавай  гъвечIи комплексдиз мугьман хьана.

Куьруь сиягьатдин вахтунда  Зайдин Жамбулатова мугьманриз хабар гайивал,  ДагГАУ-да як, нек, емишарни майваяр гьялунин технологияр тамамдаказ ишлемишзава. Ина емишрин пастаяр, мармалатар, кьурурнавай емишрин зурар ва гьатта чIу­лав серг гьазурзава. Университетдихъ зи­гьиндин хсусиятдик акатзавай 100-далай артух объектриз талукь документар ава.

Ректордин гафаралди, виридалайни хъсан чешнейрикай сад нек гьялдай ва не­­кIе­дикай 200-далай артух жуьрейрин продуктар гьазурдай гъвечIи комплекс я. ДагГАУ-да Италиядай гъанвай тадаракрал “Моцарелла”, “Буррата”, “Сулугуни” сортарин нисияр, гьакIни шур ва маса суьрсет гьазурзава.

Ина акъуднавай некIедин бязи продуктрин дад акун теклифуналди, аграрный вуздин  руководителди гьакIни къейд авурвал, и мукьвара Россиядин мулкунал­ футболдай дуьньядин чемпионат кьиле фидай вахтунда  ДагГАУ-диз, санлай къачурла, 2,7 тонндин кьадарда аваз ниси агакьаруниз талукь заказ атанай.

Вичин нубатдай Артем Здунова къейд авурвал, республикадивай ихьтин продуктралди лайихлудаказ дамах ийиз жеда.

“КьетIендаказ къейд ийиз кIанзава хьи, чавай экологиядин жигьетдай михьиди тир суьрсет гьатта меркезда акъудиз жезва”, – лагьана Гьукуматдин Председателди.

Абдулмуслим Абдулмуслимовани  комплексда акъудзавай  некIедин продукциядин еридиз виниз тир къимет гана ва  ида республикадихъ  малдарвилин суьрсет гьасилунин, ам гьялунин карда  герек вири серенжемар хуьруьн майишатдин суьрсет гьасилзавай ксарин кооперативрин куьмекдалди тешкилунин игьтияж авайди тестикьарзавайдакай лагьана.

“И кар им неинки малдарвилин, гьакI маса гьар жуьре продукциядиз талукь я. Хуьруьн майишатдин кооперациядивай, дугъриданни, региондин АПК-да  арадал атанвай гзаф кьадар месэлаяр гьялиз жезва”, – малумарна министрди.

Экономикадин отдел


Всего просмотров: 42

Читайте также: