2-нумра акъатнава

“Дагъустандин дишегьли” журналдин нубатдин нумра ЧIе­хи Гъалибвилин 75 йисаз талукьарнава. Адан жилдинал Дербентда авай «Гъам чIугваз­вай диде» гуьмбетдин шикил ганва.

«Вуч хуьзва театррин та­рихдин музейда?» тIвар алай ма­къа­лада кIелзавайбурун фикирдиз Да­гъустандин театррин та­рих­дин­­­ музейдин директор, Да­гъустандин образованидин отличник, РД-дин лайихлу муаллим, Моск­ва­дин «Бахрушинан кIелунрин» иш­ти­ракчи Лилия Гьасановна Жа­­ма­лутдиновадихъ галаз хьайи суьгь­бет гъизва.

Къанлу дяве! Чпин эсерра дя­ведикай, душмандин инсафсузвиликай, ислягьвал патал чанар гайи аскеррикай, гъалиб­виликай…  кхьин тавур шаир, гьикаятчи бажа­гьат ава. «РикIел хуь­нин ва баркаллувилин йис» рубрикадик кваз Наж­мудин Шихнабиева аялар па­тал­ кхьенвай «Баят фу» гьикая ганва.­

«Чи игит руш — мягькем аскер…» — и макъалада Рагнеда Ра­малдановади куьн дишегьли па­тал адетдинди тушир пешедин ие­си, полициядин старший прапорщик, Росгвардиядин Управленидин Дагъустан Респуб­ли­кадин подразделенийра кино­логвиле кIвалахзавай Фируза Абдурагьмановадихъ галаз танишарда.

Махачкъаладин тарихдин ва медениятдин имаратрикай сад тир Буйнакскийдин куьчеда авай да­раматдикай, ам эцигуникай, ЧIе­хи дяведин йисара ина госпиталь тешкилуникай «Зи Да­гъус­тан» рубрикадай кIелиз жеда.

«Алатай девирдин ва гележегдин гъал атIузва». И макъа­ла­да­ машгьур филолог, педагог, журналист ва таржумачи, культурадин  лайихлу  работник  Ро­за Эльдаровадихъ галаз адан уьмуьр­­дикай, пешедикай, илимдин рекьикай хьайи суьгьбет ганва­.

Хазран Кьасумован «Бахтунинни гьуьрметдин къужахда» макъалада Вини СтIалдал яшамиш жезвай Жанна Александровна Мегьамедовадикай (Аншуковадикай) ихтилатзава.

«За адетрин тереф а вахтунда хуьзва хьи, эгер абуру дишегьлидин уьмуьр, адан намус, ла­йих­лувал ва ихтиярар хуьзва­тIа. Ам­ма за дидевилин бахтуниз ва аялвилиз, хизанда хушбахтвилиз зарар гузвай адетар гьич кьабулдач”, — лугьузва Ажа Абду­рагь­мановади вичин «КIвале авайди къецел» тIвар алай очеркда.

Мадни, журналдин нубатдин нумрадай гзафбурун рикI алай шаир Шагьабудин Шабатован шиирар, итижлу маса макъалаяр кIелиз жеда.

Чи мухбир


Всего просмотров: 42
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире