Мегьамед Ибрагьимов

Мукьва хьунин кам

Кьилин редактордин гаф

Дагъустандин гьукумдин кьилевайбуру менфятлудаказ кIвалахунин рекье къазанмишнавай агалкьунар фикирда кьуна, республикадиз РФ-дин Гьукуматдин 2019-йисан 30-ноя­брдиз акъуднавай 2875-р нумрадин тапшуругъдин бине­даллаз 1,2 миллиард манатдин кьадардин грант чара авунва. Къейд ийин хьи, Урусатдин Гьукуматди ихьтин грантар уьлкведин мад 49 региондиз ганва.

Гьелбетда, республикадин кьилевайбурун кIва­лахдиз ихьтин дережада аваз къимет гун Дагъларин уьлкве патал еке метлеб авай вакъиа хьиз гьисабиз жеда. Гьакъикъатдани, Владимир Васильеван регьбервилик кваз эхиримжи йисара Дагъустанда хъсан патахъ гзаф дегишвилер кьиле фенва. Им вири месэлаяр гьялнава, къайдадик ква лагьай чIал туш. Халкьдин яшайиш къулайди хьун патал хъуву­на кIанзавай крар, дердияр мадни ава. Амма жуьреба-жуьре хилера тамамарнавай кIвалахар къейд тавуна жедач.

Мисал яз, алатай йисуз кар алай “Зи Дагъустан — шегьердин къулай шартIар”, “Зи Дагъустан — зи яд”, “Зи Дагъустан — зи рекьер” проектрин сергьятра аваз республикадин шегьерра, районра, хуьрера рекьер цIийикIа туьхкIуьрнава, куьчеяр аваданлу авунва, ял ядай паркар, аялар къугъвадай майданар арадал гъанва, агьалияр хъвадай хъсан еридин целди таъминарун патал цIийи объектар эцигнава ва икI мад. Винидихъ тIвар кьур проектрин сергьятра аваз авунвай кIвалахрикай гегьеншдиз “Лезги газетдин” алатай йисан 52-нумрадиз акъатай “Кьилиз акъуднава” макъалада раханва. Яшайишдин, здравоохраненидин, культурадин, спортдин хилерани хейлин дегишвилер кьиле фенва. И сеферда чун абурукай рахазвач.

Владимир Васильев халкьдиз мукьва жез, гьукумдиз жемиятди ийизвай ихтибар артухариз алахъзава. Винидихъ тIвар кьур грантдин такьатар харждай рекьер хкядай мумкинвал жемятдиз гуни и кар нубатдин сеферда тестикьарзава. ФЛНКА-дин исполкомдин председатель Гьуьсен Шагьпазован фикирдалди, грантдин такьатар харждай рекьер тайинарунин кардал жемият желб авун хъсан ва менфят­лу къарар хьиз кьабулиз жеда. Дагъустандин халкьди Владимир Васильеван ва адан дестедин патай гьа ихьтин камар вилив хуьзва. Жемиятдин тешкилатрихъ галаз алакъа хуьнин нетижада республика патал хийирлу гзаф проектар кьилиз акъудиз жеда.

“Им гьукумдин ва жемиятдин арада авай ихтибар къалурзавай рекъем, халкьдиз мукьва хьунин рекье къачунвай нубатдин кам я. Жергедин агьалийрин арада метлеблу, кар алай меслятар гуз жедайбур гзаф ава. Васильева кьабулнавай къарарди абуруз чпин фикирар гьукумдал агакьардай мумкинвал гузва”, — лугьузва Гьуьсен Шагьпазова.

Къейд ийин хьи, ихтилат физвай грантдин такьатар харж авунин жигьетдай фикирар лугьудай мумкинвал гьар са дагъустанвидиз ава. И кардиз талукь­ меслятар, теклифар кIватIунин месэла пуд паюникай ибарат я. Сад лагьай пай 22-январдиз акьалтIда. Адалай кьулухъ теклифар кьабул хъийидач. Кьвед лагьай пай атанвай вири теклифриз къимет гуникай ибарат я. Абурун арадай гьар са хиляй (образование, здравоохранение, яшайиш…) интернетдин куьмекдалди (онлайн) сесер гун патал виридалайни сечме, важиблу 5 теклиф хкяда. И месэла 11-февралдалди куьтягьда.

Пуд лагьай паюна гьар са хиляй виридалайни гзаф сесер хьанвай 3 теклиф хкяда ва абур къарар кьабулун патал республикадин руководстводал агакьарда.

Играми газет кIелзавайбур! Эгер квехъ ихтилат физвай месэладин патахъай къиметлу теклифар, фи­кирар аватIа, абур электронный почтадин  minec@e-­dag.ru  ва я  post@minec-rd.ru  адресриз рекье тур. Чарче теклиф грантдин такьатар харж авунин месэладиз талукь тирди къейд авун, фамилия, тIвар, бубадин тIвар, эгер кIвалахзаватIа, идарадин тIвар, яш, телефондин нумра, электронный почтадин адрес, яшамиш жезвай чка, теклиф талукь хел къалурун шартI я.

Мегьамед Ибрагьимов


Всего просмотров: 77
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире