11 процент тешкилзава

“Дагъустан спортсменринни инвалидрин республика я” лугьудай ванер мукьвал-мукьвал къвезватIани,  “инвалидвал” авайбур ахтармишайла, дагъустанвийрин арада ахьтинбурун кьадарди 11 процент тешкилзава. Идакай Россиядин зегьметдин ва яшайишдин  рекьяй хуьдай министерстводин “Дагъустан Республикада авай МСЭ-дин кьилин бюродин” пресс-къуллугъди хабар гузва.

Ибур СКФО-дин, гьакI санлай уьлкведа авай юкьван рекъемрихъ галазни сад хьтинбур я. Кьиле тухузвай ахтармишунрин, гьа гьисабдай яз “Дагъустан Республикада авай МСЭ ГБ” ФКУ-дин кIвалахда рехъ ган­вай­ чIурувилер арадай акъудун патал План уьмуьрдиз­ кечирмишунин нетижада Дагъустанда инвалидвал гунин хиле кIвалах къайдадик акатнава. Адет тирвал, ин­валидвал гузвай ксарин чIехи пай яшлу инсанрал ацалтзава, зегьметдиз къабил ксарин арада инвалидрин кьадар агъуз ават­зава.

2019-йисан 1-январдиз авай делилралди, Дагъустанда 3 063 885 агьали яшамиш жезва, абурукай 338 089 кас инвалидар я. Эгер яшариз килигна инвалидрин кьадар дегиш хьунин тегьер (динамика) ахтарми­шайтIа, 2017-йисав гекъигайла, 2018-йисуз инвалидар яз гьисабнавай аялрин кьадар — 24, гьакIни зегьметдиз къабил инсанрин арадани ин­валидвилин дережа къачунвайбурун ­кьадар 18,8 процентдин агъуз аватнавайди малум жезва. Идахъ галаз сад хьиз, яшар 60-далай алатнавайбурун арада инвалидар яз гьисабнавай ксарин кьадар артух хьанва. Им, шаксуз, винидихъ тIвар кьунвай План кьилиз акъудунин нетижа я.

ИкI, 2018-йисуз 11 335 агьалидиз сифте яз инва­лид­вал гана. 2017-йисуз лагьайтIа, ахьтинбурун кьадар­ 13 782 тир, яни 17,8 процентдин агъуз аватна. Идахъ галаз сад хьиз, зегьметдиз къабил инсанрин арада и дережа къачузвайбурун кьадар тIимил (22,9 %), пенсиядин яшара авайбурун арадани артух (5,5%) хьана.

«Лезги газет»


Всего просмотров: 18

Читайте также: