Шад гьалара къейдна

И мукьвара Махачкъалада, Елена Исинбаевадин тIварунихъ галай стадиондал боксдин международный югъ къейдна. Спортдин серенжемда   республикадин спортшколайра вердишвилер къачузвай агъзурдалай виниз аялри, Дагъларин уьлкведин машгьур спортсменри, гьакIни республикадин жавабдар къуллугърал алай ксари иштиракна. Мярекатдиз атанвайбурун арада Дагъустандин Гьукуматдин Председатель, республикадин боксдин федерациядин гуьзчивалдай со­ветдин председатель Артём Здуновни авай. Ада кIватI хьанвайбуруз, гьакIни спортдин и жуьредал машгъул жезвай вири ксариз боксдин югъ тебрикна.

— Боксдин сувариз талукь тир чIехи мяре­ка­тар Москвада, Яру майдандал кьиле физва. Сан­лай къачурла, Россиядин вири регионри боксдин йикъаз талукь серенжемра иштиракзава. Да­гъустанни сифтегьанбурун жергеда ава. Чи республикадин тIвар-ван авай спортсменри чун вири зарядка авун патал кIватI­нава. Заз и карда виридахъ агалкьунар хьана кIанза­ва, — алхишна ада.

Сувар тебрик авурбурун арада боксдай дуьньядин чемпион, алай вахтунда Дагъустандин боксдин федерациядин кьиле акъвазнавай чи ватандаш  Альберт Селимовни авай.

— Дагъустан спортдин республика я. Ина боксдай чIехи кукIушриз хкаж хьайи — Европадин, дуьньядин ва Олимпиададин къугъунра гъалибвилер къазанмишай хейлин спортсменар гьазурна. Къе абур вири и стадиондал кIватI хьан­ва­. Абур чпин девлетлу тежрибадикай са кьадар­ си­рер квезни чириз гьазур я. Ша чна вирида дуствилелди абурун тереф хуьн, — лагьа­на А.Селимова.

Стадиондал кIватI хьанвайбур патал Олим­пиададин чемпион Гьайдарбег Гьайдарбегова, Олимпиададин призёр, пешекаррин арада дуьньядин чемпион Сул­тан Ибра­гьи­мова, Олимпиададин призёрар — 3 сеферда дуьньядин чемпион Мегьамедрасул Межидова, дуьньядин чемпион Тимур Гьайдалова, Россиядин лайихлу тренер Нурипаша Талибова ва гзаф масабуру зарядка кьиле тухвана.

Чи мухбир


Всего просмотров: 30

Читайте также: