100 йисан сувар мубарак

Шумуд сар я вун зи рикIе гьат хьана,

На лугьуди, вун зи вахни стха я.

Лезги халкьдин дамахни яз, даяхни,

Ваз цIинин йис — чIехи сувар мубарак!

 

Ви лезги халкь, циф хьиз дагъдал алкIанвай,

Аквазва чаз кьуд пад  вири диганвай.

Багъ, бустанар емишривди ацIанвай,

Лезги халкьдиз чIехи сувар мубарак!

 

Ви рухваяр, дуьньядиз эзбер хьайи.

Гьамишанда лезги чIалал рахайд я.

Душманрикай  лезги халкьдин чил хвейи,

Ви архайриз къе и сувар мубарак!

 

Гьажи Давуд, Мегьамед чи ярагъви,

Лезгинцевни Етим Эмин, Гьасанни,

Кьуьчхуьр Саид, Куьре Мелик, Сулейман

Лугьуз, къведай ваз и сувар мубарак!

 

“Лезги газет” на дуьньядиз эзберна,

Лезги халкьдин камаллу тир рухваяр.

Виш йисара ислягьвилихъ эверна,

Сад хьун патал чи вахарни стхаяр.

 

Вун, дуьньядал аватIа, чаз сад ава,

Ви чантада виш йисарин гад ава.

Вахъ рикI кудай кьакьан дагълар къад ава,

Багъри газет, ваз ви сувар мубарак!

 

Шумуд жуьре дегишарна ви къамат,

Гьамишанда на адалат хвейид я.

Зайифвилиз садрани рехъ гайид туш,

“Лезги газет”, ваз хайи югъ мубарак!

 

Вун кIелзавай гьар са лезги шад я къе,

Чи игитар Араз, Эсед, Валентин,

Чеб амачтIан амазма къе чи рикIе,

Ви патай къе абуруз сувар мубарак!

 

Чи Шарвили тур гъилеваз къекъвезва,

Дагъдин лекь хьиз, лув гузавай цавара,

“Лезги газет” гьар гьафтеда хквезвай,

Виш сан сувар ваз цIинин суз мубарак!

 

Агъзур йисар хъхьурай ви къелемдин,

ЦIийи, цIийи бегьерар хьуй цIарара,

Чи шаирар, журналистар кьилеваз,

Ван авурай мад виш сарин сувара.

 

Вадим Жамалдинов


Всего просмотров: 27
Подпишитесь на наши каналы:

Читайте также:


Новости партнеров