9-ноябрдиз Махачкъалада, Р.Гьамзатован тIварунихъ галай Милли библиотекадин чIехи залда, Да­гъустандин радиодин 90 йис тамам хьуниз талукьарнавай чIехи мярекат кьиле фена.

Милли библиотекадин чIехи зал Да­гъустандин радиодихъ галаз ала­къа хуьзвай ксарай, адан дустарай ацIузва, сада-садаз тебрикар ийизва.

Мярекат, гъвечIи суьгьбет авуналди, адан тешкилатчийриз чIехи куьмек гайи Дагъустандин радиодин урус редакциядин къуллугъчи Бике Гьуьсейновади ачухна ва сифте гаф ГТРК-дин директор Луиза Алихановадиз гана.

ЦIуд йисалай гзаф вахтунда ГТРК-диз регьбервал гузвай Л.Алиханова вичин рахунрив мярекатдиз атанвай мугьманар тебрикунилай эгечIна.

— Къенин югъ тарихда амукьдайбурукай я. ГьикI лагьайтIа, и иер межлисдилай чна Дагъустандин радиодин юбилейдиз талукьарнавай мя­рекатар тухун ачухзава. Да­гъус­тандин радиодин 90-йисан юбилейдин чIехи межлис Къумукьрин госмуздрамтеатрдин залда тухуниз гьа­зурвилер аквазва, — лагьа­на ада.

Дагъустандин халкьдин артист, халкьдин милли алатрин оркестрдин дирижер Навруз Шагьбазова мярекатдин иштиракчийриз оркестрдин тарихдикай, къенин йикъан кIвалахдикай суьгьбетна.

РФ-дин искусствойрин лайихлу деятель,композитор Мегьамед Гьуьсейнова радиодин къуллугъчийрин арада авай стхавиликай, дуствиликай ва ана кIвалахдай чIавуз вич шагьид хьайи дуьшуьшрикай суьгьбетна.

— Радиода кIвалахай йисар зи уьмуьрда бахтлубур тир. Уьлкведа авай ислягьвал ва халкьарин стхавал завай рикIелай алудиз жедач. Алай аямдани чна радио вилик фин патал зегьмет чIугуна, пешекаррин жегьил несил тербияламишна ва ана кIвалахзавай ксарин зегьметдал къимет эцигна кIанда.

Межлис Дагъустандин халкьдин артист Абдула Магьамедмирзоева, Дагъустандин лайихлу артист Яхья Исакьова ва ашукь Асланжиди манияр лугьуналди давамарна.

Владик Батманов

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя